kya roiye hamin ko yun aan kar ke mara

kyā roiye hamīñ ko yuuñ aan kar ke maarā

mehr-e-but-e-digar se tūfān kar ke maarā

turbat kā merī lohā ā.īne se kare hai

yā'nī ki un ne mujh ko hairān kar ke maarā

begāna jaan un ne kyā choT raat ko kī

muñh dekh dekh merā pahchān kar ke maarā

pahle gale lagāyā phir dast-e-jaur uThāyā

maarā to un ne lekin ehsān kar ke maarā

us sust-'ahd ne kyā kī thī qasam mujhī se

bahutoñ ko un ne ‘ahd-o-paimān kar ke maarā

hāzir yarāq honā kaahe ko chāhiye thā

mujh be-navā ko kyā kyā sāmān kar ke maarā

kahne lagā ki shab ko mere ta.iiñ nasha thā

mastāna 'mīr' ko maiñ kyā jaan kar ke maarā

kya roiye hamin ko yun aan kar ke mara

mehr-e-but-e-digar se tufan kar ke mara

turbat ka meri loha aaine se kare hai

ya'ni ki un ne mujh ko hairan kar ke mara

begana jaan un ne kya choT raat ko ki

munh dekh dekh mera pahchan kar ke mara

pahle gale lagaya phir dast-e-jaur uThaya

mara to un ne lekin ehsan kar ke mara

us sust-'ahd ne kya ki thi qasam mujhi se

bahuton ko un ne ‘ahd-o-paiman kar ke mara

hazir yaraq hona kahe ko chahiye tha

mujh be-nawa ko kya kya saman kar ke mara

kahne laga ki shab ko mere tain nasha tha

mastana 'mir' ko main kya jaan kar ke mara