kya tan-e-nazuk hai jaan ko bhi hasad jis tan pe hai

kyā tan-e-nāzuk hai jaañ ko bhī hasad jis tan pe hai

kyā badan kā rang hai tah jis kī pairāhan pe hai

gard jab uThtī hai ik hasrat se rah jaate haiñ dekh

vahshiyān-e-dasht kī aañkh us shikār-afgan pe hai

kasrat-e-paikāñ se tere ho ga.ī hai.at hī aur

ab sharaf dil ko hamāre pāra-e-āhan pe hai

kaun yuuñ ai turk-e-rā.anā zīnat-e-fitrāk thā

ḳhuuñ se gul-kārī ajab ik ziin ke dāman pe hai

sar uThāne kī nahīñ hai ham ko fursat ishq meñ

har dam ik teġh-e-jafā-e-tāza yaañ gardan pe hai

nauhagar kar mujh ko dikhlāyā ġham-e-dil ne nidān

shevan ab mauqūf yāroñ kā mire shevan pe hai

ho chukā rahnā mirā bastī meñ āḳhir kab talak

nāla-e-shab se qayāmat roz mard-o-zan pe hai

ḳhirman-e-gul se lageñ haiñ duur se kūḌoñ ke Dher

lohū rone se hamāre rang ik gulḳhan pe hai

ve phirī palkeñ ulaT detī haiñ saf ik aan meñ

ab laḌā.ī hind meñ sab us siyah palTan pe hai

tū to kahtā hai ki maiñ ne us taraf dekhā nahīñ

ḳhūn-e-nāhaq 'mīr' kā ye kis kī phir chitvan pe hai

kya tan-e-nazuk hai jaan ko bhi hasad jis tan pe hai

kya badan ka rang hai tah jis ki pairahan pe hai

gard jab uThti hai ek hasrat se rah jate hain dekh

wahshiyan-e-dasht ki aankh us shikar-afgan pe hai

kasrat-e-paikan se tere ho gai haiat hi aur

ab sharaf dil ko hamare para-e-ahan pe hai

kaun yun ai turk-e-raana zinat-e-fitrak tha

KHun se gul-kari ajab ek zin ke daman pe hai

sar uThane ki nahin hai hum ko fursat ishq mein

har dam ek tegh-e-jafa-e-taza yan gardan pe hai

nauhagar kar mujh ko dikhlaya gham-e-dil ne nidan

shewan ab mauquf yaron ka mere shewan pe hai

ho chuka rahna mera basti mein aaKHir kab talak

nala-e-shab se qayamat roz mard-o-zan pe hai

KHirman-e-gul se lagen hain dur se kuDon ke Dher

lohu rone se hamare rang ek gulKHan pe hai

we phiri palken ulaT deti hain saf ek aan mein

ab laDai hind mein sab us siyah palTan pe hai

tu to kahta hai ki main ne us taraf dekha nahin

KHun-e-nahaq 'mir' ka ye kis ki phir chitwan pe hai