labon par hai har lahza aah-e-sharar-bar

laboñ par hai har lahza āh-e-sharar-bār

jalā hī paḌā hai hamārā to ghar-bār

huiiñ kis sitam-dīda ke paas yakjā

nigāheñ sharar-rez palkeñ jigar-bār

kaho koī dekhe use sair kyūñkar

ki hai us tan-e-nāzuk-ūpar nazar baar

halāvat se apnī jo āgāh hoñ to

chipak jaa.eñ bāham ve lā'l-e-shakar-bār

subuk kar diyā dil kī be-tāqatī ne

na jaanā thā us kī taraf ham ko har baar

gadhā sā ladā phirtā hai shaiḳh har-sū

ki jubba hai yak baar o ammāma sar-bār

mire naḳhl-e-mātam pe hai sang-bārāñ

nihāyat ko laayā 'ajab ye shajar baar

hameñ baar us dar pe kasrat se kyā ho

lagā hī rahe hai sadā vaañ to darbār

ye āñkheñ ga.iiñ aisī ho kar dur-afshāñ

ki dekhe se aaya tar abr-e-guhar-bār

kab is 'umr meñ aadmī shaiḳh hogā

kitābeñ rakhīñ saath go ek ḳhar-bār

jahāñ 'mīr' rahne kī jāgah nahīñ hai

chalā chāhiye yaañ se asbāb kar baar

labon par hai har lahza aah-e-sharar-bar

jala hi paDa hai hamara to ghar-bar

huin kis sitam-dida ke pas yakja

nigahen sharar-rez palken jigar-bar

kaho koi dekhe use sair kyunkar

ki hai us tan-e-nazuk-upar nazar bar

halawat se apni jo aagah hon to

chipak jaen baham we la'l-e-shakar-bar

subuk kar diya dil ki be-taqati ne

na jaana tha us ki taraf hum ko har bar

gadha sa lada phirta hai shaiKH har-su

ki jubba hai yak bar o ammama sar-bar

mere naKHl-e-matam pe hai sang-baran

nihayat ko laya 'ajab ye shajar bar

hamein bar us dar pe kasrat se kya ho

laga hi rahe hai sada wan to darbar

ye aankhen gain aisi ho kar dur-afshan

ki dekhe se aaya tar abr-e-guhar-bar

kab is 'umr mein aadmi shaiKH hoga

kitaben rakhin sath go ek KHar-bar

jahan 'mir' rahne ki jagah nahin hai

chala chahiye yan se asbab kar bar