le rang-e-be-sabaati ye gulistan banaya

le rang-e-be-sabātī ye gulistāñ banāyā

bulbul ne kyā samajh kar yaañ āshiyāñ banāyā

uḌtī hai ḳhaak yā-rab shām-o-sahar jahāñ meñ

kis ke ġhubār-e-dil se ye ḳhāk-dāñ banāyā

ik rang par na rahnā yaañ kā 'ajab nahīñ hai

kyā kyā na rang laa.e tab ye jahāñ banāyā

ā.īne meñ kahāñ hai aisī safā kahe tū

jabhoñ se rāstoñ ke vo āstāñ banāyā

sar-gashta aisī kis kī haath aa ga.ī thī miTTī

jo charḳh-zan qazā ne ye āsmāñ banāyā

naqsh-e-qadam se us ke gulshan kī tarh Daalī

gard-e-rah us kī le kar sarv-e-ravāñ banāyā

hone pe jam' apne phūlā bahut thā lekin

kyā ġhuncha tang aayā jab vo dahāñ banāyā

is sahn par ye vus'at allah re terī san'at

me'mār ne qazā ke dil kyā makāñ banāyā

qaaf

dil Tuk idhar na aayā īdhar se kuchh na paayā

kahne ko tark le kar ik svāñg yaañ banāyā

daryūza karte guzrī galiyoñ meñ 'umr apnī

darvesh kab hue ham takiya kahāñ banāyā

vo to miTā gayā thā turbat bhī 'mīr' jī kī

do-chār īñTeñ rakh kar phir maiñ nishāñ banāyā

le rang-e-be-sabaati ye gulistan banaya

bulbul ne kya samajh kar yan aashiyan banaya

uDti hai KHak ya-rab sham-o-sahar jahan mein

kis ke ghubar-e-dil se ye KHak-dan banaya

ek rang par na rahna yan ka 'ajab nahin hai

kya kya na rang lae tab ye jahan banaya

aaine mein kahan hai aisi safa kahe tu

jabhon se raston ke wo aastan banaya

sar-gashta aisi kis ki hath aa gai thi miTTi

jo charKH-zan qaza ne ye aasman banaya

naqsh-e-qadam se us ke gulshan ki tarh Dali

gard-e-rah us ki le kar sarw-e-rawan banaya

hone pe jam' apne phula bahut tha lekin

kya ghuncha tang aaya jab wo dahan banaya

is sahn par ye wus'at allah re teri san'at

me'mar ne qaza ke dil kya makan banaya

qaf

dil Tuk idhar na aaya idhar se kuchh na paya

kahne ko tark le kar ek swang yan banaya

daryuza karte guzri galiyon mein 'umr apni

darwesh kab hue hum takiya kahan banaya

wo to miTa gaya tha turbat bhi 'mir' ji ki

do-chaar inTen rakh kar phir main nishan banaya