log bahut puchha karte hain kya kahiye miyan kya hai ishq

log bahut pūchhā karte haiñ kyā kahiye miyāñ kyā hai ishq

kuchh kahte haiñ sirr-e-ilāhī kuchh kahte haiñ ḳhudā hai ishq

ishq kī shaan arfa.a aksar hai lekin shāneñ ajā.ib haiñ

gah saarī hai dimāġh-o-dil meñ gaahe sab se judā hai ishq

kaam hai mushkil ulfat karnā is gulshan ke nihāloñ se

bū-kash ho kar seb-e-zaqan kā ġhash na kare to sazā hai ishq

ulfat se parhez kiyā kar kulfat is meñ qayāmat hai

ya.anī dard-o-ranj-o-ta’ab hai āfat-e-jān balā hai ishq

'mīr' ḳhilāf-e-mizāj mohabbat mūjib-e-talḳhī-kashīdan hai

yaar muāfiq mil jaave to lutf hai chaah maza hai ishq

log bahut puchha karte hain kya kahiye miyan kya hai ishq

kuchh kahte hain sirr-e-ilahi kuchh kahte hain KHuda hai ishq

ishq ki shan arfa aksar hai lekin shanen ajaib hain

gah sari hai dimagh-o-dil mein gahe sab se juda hai ishq

kaam hai mushkil ulfat karna is gulshan ke nihaalon se

bu-kash ho kar seb-e-zaqan ka ghash na kare to saza hai ishq

ulfat se parhez kiya kar kulfat is mein qayamat hai

yani dard-o-ranj-o-ta’ab hai aafat-e-jaan bala hai ishq

'mir' KHilaf-e-mizaj mohabbat mujib-e-talKHi-kashidan hai

yar muafiq mil jawe to lutf hai chah maza hai ishq