manind-e-murgh dost na kah bar bar dost

mānind-e-murġh dost na kah baar baar dost

Tuk soch bhī hazār haiñ dushman hazār dost

khaḌke hai paat bhī to lagā baiThtā hai choT

ram-ḳhurda vo ġhazāl bahut hai shikār-dost

sab ko hai rashk mujh meñ jo tujh meñ hai iḳhtilāt

dushman hue haiñ dostī se terī yār-dost

tujh se hazār un ne banā kar diye bigāḌ

mat jaan sādgī se ki hai rozgār dost

ye to kuchh aage dushman-e-jānī se bhī chalā

maiñ jāntā thā hogā dil-e-be-qarār dost

begānagī-e-ḳhalq-e-jahāñ jā-e-ḳhauf hai

sau dushmanoñ meñ kyā hai jo nikle bhī chaar dost

mujh be-navā kī yaad rahe 'mīr' ye sadā

is mai-kade meñ rahiyo bahut hoshiyār dost

manind-e-murgh dost na kah bar bar dost

Tuk soch bhi hazar hain dushman hazar dost

khaDke hai pat bhi to laga baiThta hai choT

ram-KHurda wo ghazal bahut hai shikar-dost

sab ko hai rashk mujh mein jo tujh mein hai iKHtilat

dushman hue hain dosti se teri yar-dost

tujh se hazar un ne bana kar diye bigaD

mat jaan sadgi se ki hai rozgar dost

ye to kuchh aage dushman-e-jaani se bhi chala

main jaanta tha hoga dil-e-be-qarar dost

beganagi-e-KHalq-e-jahan ja-e-KHauf hai

sau dushmanon mein kya hai jo nikle bhi chaar dost

mujh be-nawa ki yaad rahe 'mir' ye sada

is mai-kade mein rahiyo bahut hoshiyar dost