manind-e-shama-majlis shab ashk-bar paya

mānind-e-shama.a-majlis shab ashk-bār paayā

al-qissa 'mīr' ko ham be-iḳhtiyār paayā

ahvāl ḳhush unhoñ kā ham-bazm haiñ jo tere

afsos hai ki ham ne vaañ kā na baar paayā

jiite jo zof ho kar zaḳhm-e-rasā se us ke

siine ko chaak dekhā dil ko figār paayā

shahr-e-dil ek muddat ujḌā basā ġhamoñ meñ

āḳhir ujaaḌ denā us kā qarār paayā

itnā na tujh se milte ne dil ko kho ke rote

jaisā kiyā thā ham ne vaisā hī yaar paayā

kyā e'tibār yaañ kā phir us ko ḳhvār dekhā

jis ne jahāñ meñ aa kar kuchh e'tibār paayā

aahoñ ke shole jis jā uThte the 'mīr' se shab

vaañ jā ke sub.h dekhā musht-e-ġhubār paayā

manind-e-shama-majlis shab ashk-bar paya

al-qissa 'mir' ko hum be-iKHtiyar paya

ahwal KHush unhon ka ham-bazm hain jo tere

afsos hai ki hum ne wan ka na bar paya

jite jo zof ho kar zaKHm-e-rasa se us ke

sine ko chaak dekha dil ko figar paya

shahr-e-dil ek muddat ujDa basa ghamon mein

aaKHir ujaD dena us ka qarar paya

itna na tujh se milte ne dil ko kho ke rote

jaisa kiya tha hum ne waisa hi yar paya

kya e'tibar yan ka phir us ko KHwar dekha

jis ne jahan mein aa kar kuchh e'tibar paya

aahon ke shole jis ja uThte the 'mir' se shab

wan ja ke subh dekha musht-e-ghubar paya