mahr ki tujhse tawaqqoa thi sitamgar nikla

mahr kī tujh se tavaqqo.a thī sitamgar niklā

mom samjhe the tire dil ko so patthar niklā

daaġh huuñ rashk-e-mohabbat se ki itnā betāb

kis kī taskīñ ke liye ghar se tū bāhar niklā

jiite jī aah tire kūche se koī na phirā

jo sitam-dīda rahā jā ke so mar kar niklā

dil kī ābādī kī is had hai ḳharābī ki na pūchh

jaanā jaatā hai ki us raah se lashkar niklā

ashk-e-tar qatra-e-ḳhūñ laḳht-e-jigar pārā-e-dil

ek se ek adad aañkh se bah kar niklā

kunj-kāvī jo kī siine kī ġham-e-hijrāñ ne

is dafīne meñ se aqsām-e-javāhar niklā

ham ne jaanā thā likhegā tū koī harf ai 'mīr'

par tirā naama to ik shauq kā daftar niklā

mahr ki tujh se tawaqqoa thi sitamgar nikla

mom samjhe the tere dil ko so patthar nikla

dagh hun rashk-e-mohabbat se ki itna betab

kis ki taskin ke liye ghar se tu bahar nikla

jite ji aah tere kuche se koi na phira

jo sitam-dida raha ja ke so mar kar nikla

dil ki aabaadi ki is had hai KHarabi ki na puchh

jaana jata hai ki us rah se lashkar nikla

ashk-e-tar qatra-e-KHun laKHt-e-jigar para-e-dil

ek se ek adad aankh se bah kar nikla

kunj-kawi jo ki sine ki gham-e-hijran ne

is dafine mein se aqsam-e-jawahar nikla

hum ne jaana tha likhega tu koi harf ai 'mir'

par tera nama to ek shauq ka daftar nikla