main hun KHak-uftada jis aazar ka

maiñ huuñ ḳhāk-uftāda jis āzār kā

ishq bhī us kā hai naam ik pyaar kā

bechtā sar kyoñ na galiyoñ meñ phirūñ

maiñ huuñ ḳhvāhāñ lutf-e-tah-bāzār kā

ḳhuun kar ke Tuk na dil un ne liyā

kushta-o-murda huuñ is isrār kā

ghar se vo me.amār kā jo uTh gayā

haal abtar ho gayā ghar-bār kā

naql us kī bevafā.ī kī hai asl

kab vafādārī hai sheva yaar kā

sar jo de de mārte ghar meñ phire

rang dīgar hai dar-o-dīvār kā

ik gadā-e-dar hai sailāb-e-bahār

ġham-kashoñ ke dīda-e-ḳhūñ-bār kā

dil-barāñ dil jins hai gunjā.ishī

is meñ kuchh nuqsāñ nahīñ sarkār kā

ishq kā maarā hai kyā panpegā 'mīr'

haal hai bad-hāl is bīmār kā

main hun KHak-uftada jis aazar ka

ishq bhi us ka hai nam ek pyar ka

bechta sar kyon na galiyon mein phirun

main hun KHwahan lutf-e-tah-bazar ka

KHun kar ke Tuk na dil un ne liya

kushta-o-murda hun is israr ka

ghar se wo meamar ka jo uTh gaya

haal abtar ho gaya ghar-bar ka

naql us ki bewafai ki hai asl

kab wafadari hai shewa yar ka

sar jo de de marte ghar mein phire

rang digar hai dar-o-diwar ka

ek gada-e-dar hai sailab-e-bahaar

gham-kashon ke dida-e-KHun-bar ka

dil-baran dil jins hai gunjaishi

is mein kuchh nuqsan nahin sarkar ka

ishq ka mara hai kya panpega 'mir'

haal hai bad-haal is bimar ka