main hun tu hai darmiyan shamsher hai

maiñ huuñ tū hai darmiyāñ shamsher hai

safk-e-dam meñ mere ab kyā der hai

ḳhizr dasht-e-ishq meñ mat jā ki vaañ

har qadam maḳhdūm ḳhauf-e-sher hai

raah tak tak kar hue haiñ jāñ-ba-lab

par vahī ab tak bhī yaañ auser hai

jo gurasna dil thā us dīdār kā

apne jiine hī se vo ab sair hai

kuchh nahīñ jaañ un ke pesh-e-tār-e-mū

ghar meñ sham'ī rangoñ ke andher hai

paak hī hotī rahī kushtī-e-ḳhalq

har zabardast us javāñ kā zer hai

tā.eroñ ne gul-fishāñ kī merī gor

sāmne phūloñ kā goyā Dher hai

āshnā Duube bahut is daur meñ

garche jaama yaar kā kam-gher hai

āñchal us dāman kā haath aatā nahīñ

'mīr' dariyā kā sā us kā pher hai

main hun tu hai darmiyan shamsher hai

safk-e-dam mein mere ab kya der hai

KHizr dasht-e-ishq mein mat ja ki wan

har qadam maKHdum KHauf-e-sher hai

rah tak tak kar hue hain jaan-ba-lab

par wahi ab tak bhi yan auser hai

jo gurasna dil tha us didar ka

apne jine hi se wo ab sair hai

kuchh nahin jaan un ke pesh-e-tar-e-mu

ghar mein sham'i rangon ke andher hai

pak hi hoti rahi kushti-e-KHalq

har zabardast us jawan ka zer hai

taeron ne gul-fishan ki meri gor

samne phulon ka goya Dher hai

aashna Dube bahut is daur mein

garche jama yar ka kam-gher hai

aanchal us daman ka hath aata nahin

'mir' dariya ka sa us ka pher hai