main rang-e-ishq khinche bahut na-tawan hua

maiñ rañg-e-ishq khīñche bahut nā-tavāñ huā

marnā tamām ho na sakā nīm-jāñ huā

bistar se apne uTh na sakā shab hazār-haif

bīmār-e-ishq chaar hī din meñ garāñ huā

shāyad ki dil taḌapne se zaḳhm darūñ phaTā

ḳhūñ-nāb merī āñkhoñ se muñh par ravāñ huā

ġhair az ḳhudā kī zaat mire ghar meñ kuchh nahīñ

ya.anī ki ab makān mirā lā-makāñ huā

mastoñ meñ us kī kaisī ta.ayyun se hai nashist

shīsha huā na kaif kā pīr-e-muġhāñ huā

saa.e meñ taak ke mujhe rakhā asiir kar

sayyād ke karam se qafas āshiyāñ huā

ham ne na dekhā us ko so nuqsān-e-jāñ kiyā

un ne jo ik nigāh kī us kā ziyāñ huā

Tuk rakh le haath tan meñ nahīñ aur jaa.e zaḳhm

bas mere dil kā yaar jī ab imtihāñ huā

ve to khaḌe khaḌe mire ghar aa ke phir ga.e

maiñ be-dayār-o-be-dil-o-be-ḳhānumāñ huā

gardish ne āsmāñ kī ajā.ib kiyā sulūk

pīr-e-kabīr jab maiñ huā vo javāñ huā

murġh-e-chaman kī nāla-kashī kuchh ḳhunuk sī thī

maiñ aag dī chaman ko jo garm-e-fuġhāñ huā

do phuul lā ke pheñk diye merī gor par

yuuñ ḳhaak meñ milā ke mujhe mehrbāñ huā

sar khīñchā dūd-e-dil ne jahāñ tiira ho gayā

dam bhar meñ sub.h zer-e-falak kyā samāñ huā

kahte haiñ 'mīr' se kahīñ aubāsh laḌ ga.e

hangāma un se aisā ilāhī kahāñ huā

main rang-e-ishq khinche bahut na-tawan hua

marna tamam ho na saka nim-jaan hua

bistar se apne uTh na saka shab hazar-haif

bimar-e-ishq chaar hi din mein garan hua

shayad ki dil taDapne se zaKHm darun phaTa

KHun-nab meri aankhon se munh par rawan hua

ghair az KHuda ki zat mere ghar mein kuchh nahin

yani ki ab makan mera la-makan hua

maston mein us ki kaisi tayyun se hai nashist

shisha hua na kaif ka pir-e-mughan hua

sae mein tak ke mujhe rakha asir kar

sayyaad ke karam se qafas aashiyan hua

hum ne na dekha us ko so nuqsan-e-jaan kiya

un ne jo ek nigah ki us ka ziyan hua

Tuk rakh le hath tan mein nahin aur jae zaKHm

bas mere dil ka yar ji ab imtihan hua

we to khaDe khaDe mere ghar aa ke phir gae

main be-dayar-o-be-dil-o-be-KHanuman hua

gardish ne aasman ki ajaib kiya suluk

pir-e-kabir jab main hua wo jawan hua

murgh-e-chaman ki nala-kashi kuchh KHunuk si thi

main aag di chaman ko jo garm-e-fughan hua

do phul la ke phenk diye meri gor par

yun KHak mein mila ke mujhe mehrban hua

sar khincha dud-e-dil ne jahan tera ho gaya

dam bhar mein subh zer-e-falak kya saman hua

kahte hain 'mir' se kahin aubash laD gae

hangama un se aisa ilahi kahan hua