mar hi jawenge bahut hijr mein nashad rahe

mar hī jāveñge bahut hijr meñ nāshād rahe

bhuul to ham ko ga.e ho ye tumheñ yaad rahe

ham se dīvāne raheñ shahr meñ sub.hān-allāh

dasht meñ qais rahe koh meñ farhād rahe

kuchh bhī nisbat na thī jab dair se tab kyā thā shaiḳh

ham haram meñ bhī rahe to tire dāmād rahe

duur itnī to nahīñ shām-e-ajal duurī meñ

tā-sahar aisī hī jo zārī-o-fariyād rahe

sar to kaTvā hī chuke 'mīr' taḌap se to bacheñ

jo Tuk ik paañv rakhe chhātī pe jallād rahe

mar hi jawenge bahut hijr mein nashad rahe

bhul to hum ko gae ho ye tumhein yaad rahe

hum se diwane rahen shahr mein subhan-allah

dasht mein qais rahe koh mein farhad rahe

kuchh bhi nisbat na thi jab dair se tab kya tha shaiKH

hum haram mein bhi rahe to tere damad rahe

dur itni to nahin sham-e-ajal duri mein

ta-sahar aisi hi jo zari-o-fariyaad rahe

sar to kaTwa hi chuke 'mir' taDap se to bachen

jo Tuk ek panw rakhe chhati pe jallad rahe