mat sahl samjho aise hain hum kya ware dhare

mat sahl samjho aise haiñ ham kyā vare dhare

zāhir to paas baiThe haiñ par haiñ bahut pare

saḳhtī bahut hai pās-o-murā.āt-e-ishq meñ

patthar ke dil jigar hoñ to koī vafā kare

ḳhālī karūñ huuñ ro ro ke rātoñ ko dil ke tiiñ

insāf kar ki yuuñ koī din kab talak bhare

ruñdhne ne jī ke ḳhaak meñ ham ko milā diyā

goyā ki āsmān bahut aa gayā vare

dāḌhī ko terī dekh ke hañste haiñ laḌke shaiḳh

is rīsh-ḳhand ko bhī samajh Tuk tū masḳhare

jal-thal faqat nahīñ mire rone se bhar ga.e

jangal paḌe the sūkhe so vo bhī hue hare

jī ko bachā rakheñge to jāneñge ishq meñ

har-chand 'mīr' sāhib-e-qibla haiñ mangare

mat sahl samjho aise hain hum kya ware dhare

zahir to pas baiThe hain par hain bahut pare

saKHti bahut hai pas-o-muraat-e-ishq mein

patthar ke dil jigar hon to koi wafa kare

KHali karun hun ro ro ke raaton ko dil ke tin

insaf kar ki yun koi din kab talak bhare

rundhne ne ji ke KHak mein hum ko mila diya

goya ki aasman bahut aa gaya ware

daDhi ko teri dekh ke hanste hain laDke shaiKH

is rish-KHand ko bhi samajh Tuk tu masKHare

jal-thal faqat nahin mere rone se bhar gae

jangal paDe the sukhe so wo bhi hue hare

ji ko bacha rakhenge to jaanenge ishq mein

har-chand 'mir' sahib-e-qibla hain mangare