mila ya-rab kahin us said-afgan sar-basar-kin ko

milā yā-rab kahīñ us said-afgan sar-basar-kīñ ko

ki afshāñ kiije ḳhuun apne se us ke dāman-e-zīñ ko

ga.e ve sābiqe saare ḳhusūsiyyat rahe pyāre

kabhū dar tak to aa baare hamāre dil kī taskīñ ko

piye jaate nahīñ bas ab lahū ke ghūñT ye mujh se

bahut pī pī gayā Dar se tire maiñ ashk-e-ḳhūnīñ ko

na likkheñ yaar ko mahzar hamāre ḳhūn-e-nāhaq kā

dikhā deveñge ham mahshar meñ us ke dast-e-rangīñ ko

ba-juz hairat na ban āvegī koī shakl phir us se

dikhāyā ham ne gar chehra tirā sūrat-gar-e-chīñ ko

ubhar kar sang ke taḳhte se phir dekhā kiyā ūdhar

mohabbat ho ga.ī thī kohkan se naqsh-e-shīrīñ ko

ham us ke chāñd se muñh ke haiñ āshiq mah se kyā ham ko

sar apnā kabk hī maarā kare us ḳhisht-e-sīmīñ ko

hue kyā kyā muqaddas log āvāra tire ġham meñ

subuk-pā kar dikhāyā shoḳh tū ne ahl-e-tamkīñ ko

bahut muddat huī sahrā se majnūñ kī ḳhabar aa.e

nahīñ mā'lūm pesh aaya hai kyā us yār-e-dairīñ ko

liye tasbīh hāthoñ meñ jo tū bāteñ banātā hai

nahīñ dekhā hai vaa.iz tū ne us ġhārat-gar-e-dīñ ko

gayā kūche se tere uTh ke 'mīr'-āshufta-sar shāyad

paḌā dekhā thā maiñ ne rah meñ us ke sang-e-bālīñ ko

mila ya-rab kahin us said-afgan sar-basar-kin ko

ki afshan kije KHun apne se us ke daman-e-zin ko

gae we sabiqe sare KHususiyyat rahe pyare

kabhu dar tak to aa bare hamare dil ki taskin ko

piye jate nahin bas ab lahu ke ghunT ye mujh se

bahut pi pi gaya Dar se tere main ashk-e-KHunin ko

na likkhen yar ko mahzar hamare KHun-e-nahaq ka

dikha dewenge hum mahshar mein us ke dast-e-rangin ko

ba-juz hairat na ban aawegi koi shakl phir us se

dikhaya hum ne gar chehra tera surat-gar-e-chin ko

ubhar kar sang ke taKHte se phir dekha kiya udhar

mohabbat ho gai thi kohkan se naqsh-e-shirin ko

hum us ke chand se munh ke hain aashiq mah se kya hum ko

sar apna kabk hi mara kare us KHisht-e-simin ko

hue kya kya muqaddas log aawara tere gham mein

subuk-pa kar dikhaya shoKH tu ne ahl-e-tamkin ko

bahut muddat hui sahra se majnun ki KHabar aae

nahin ma'lum pesh aaya hai kya us yar-e-dairin ko

liye tasbih hathon mein jo tu baaten banata hai

nahin dekha hai waiz tu ne us ghaarat-gar-e-din ko

gaya kuche se tere uTh ke 'mir'-ashufta-sar shayad

paDa dekha tha main ne rah mein us ke sang-e-baalin ko