milne lage ho der der dekhiye kya hai kya nahin

milne lage ho der der dekhiye kyā hai kyā nahīñ

tum to karo ho sāhabī bande meñ kuchh rahā nahīñ

bū-e-gul aur rang-e-gul donoñ haiñ dilkash ai nasīm

lek ba-qadr-e-yak-nigāh dekhiye to vafā nahīñ

shikva karūñ huuñ baḳht kā itne ġhazab na ho butāñ

mujh ko ḳhudā-na-ḳhvāsta tum se to kuchh gila nahīñ

naale kiyā na kar sunā nauhe mire pe andalīb

baat meñ baat aib hai maiñ ne tujhe kahā nahīñ

ḳhvāb-e-ḳhush-e-sahar se shoḳh tujh ko sabā jagā ga.ī

mujh pe abas hai be-dimāġh maiñ ne to kuchh kahā nahīñ

chashm-e-safed-o-ashk-e-surḳh āh-e-dil-e-hazīñ hai yaañ

shīsha nahīñ hai mai nahīñ abr nahīñ havā nahīñ

ek faqat hai sādgī tis pe balā-e-jāñ hai tū

ishva karishma kuchh nahīñ aan nahīñ adā nahīñ

āb-o-havā-e-mulk-e-ishq tajraba kī hai maiñ bahut

kar ke davā-e-dard-e-dil koī bhī phir jiyā nahīñ

hove zamāna kuchh se kuchh chhūTe hai dil lagā mirā

shoḳh kisī hī aan meñ tujh se to maiñ judā nahīñ

nāz-e-butāñ uThā chukā dair ko 'mīr' tark kar

ka.abe meñ jā ke baiTh myaañ tere magar ḳhudā nahīñ

milne lage ho der der dekhiye kya hai kya nahin

tum to karo ho sahabi bande mein kuchh raha nahin

bu-e-gul aur rang-e-gul donon hain dilkash ai nasim

lek ba-qadr-e-yak-nigah dekhiye to wafa nahin

shikwa karun hun baKHt ka itne ghazab na ho butan

mujh ko KHuda-na-KHwasta tum se to kuchh gila nahin

nale kiya na kar suna nauhe mere pe andalib

baat mein baat aib hai main ne tujhe kaha nahin

KHwab-e-KHush-e-sahar se shoKH tujh ko saba jaga gai

mujh pe abas hai be-dimagh main ne to kuchh kaha nahin

chashm-e-safed-o-ashk-e-surKH aah-e-dil-e-hazin hai yan

shisha nahin hai mai nahin abr nahin hawa nahin

ek faqat hai sadgi tis pe bala-e-jaan hai tu

ishwa karishma kuchh nahin aan nahin ada nahin

aab-o-hawa-e-mulk-e-ishq tajraba ki hai main bahut

kar ke dawa-e-dard-e-dil koi bhi phir jiya nahin

howe zamana kuchh se kuchh chhuTe hai dil laga mera

shoKH kisi hi aan mein tujh se to main juda nahin

naz-e-butan uTha chuka dair ko 'mir' tark kar

kabe mein ja ke baiTh myan tere magar KHuda nahin