mere is ruk ke mar jaane se wo ghafil hai kya jaane

mire is ruk ke mar jaane se vo ġhāfil hai kyā jaane

guzarnā jaan se āsāñ bahut mushkil hai kyā jaane

koī sar sang se maaro kisī kā vāpsīñ dam ho

vo ā.īne meñ apne naaz par maa.il hai kyā jaane

nazar mutlaq nahīñ hijrāñ meñ us ko haal par mere

mirā dil us ke ġham meñ goyā us kā dil hai kyā jaane

junūnī ḳhabtī dīvāna saḌā koī ishq ko samjhe

falātūñ se nahīñ yaañ bahas vo aaqil hai kyā jaane

taḌapnā naqsh-e-pā-e-nāqa par jaane hai ik majnūñ

bayābāñ meñ vo lailā kā kidhar mahmil hai kyā jaane

paḌhāyā us ko bahterā ki mat lā rāz-e-dil muñh par

pe tifl-e-ashk ko dekhā to nā-qābil hai kyā jaane

taraf honā mirā mushkil hai 'mīr' is sher ke fan meñ

yūñhīñ 'saudā' kabhū hotā hai so jāhil hai kyā jaane

mere is ruk ke mar jaane se wo ghafil hai kya jaane

guzarna jaan se aasan bahut mushkil hai kya jaane

koi sar sang se maro kisi ka wapsin dam ho

wo aaine mein apne naz par mail hai kya jaane

nazar mutlaq nahin hijran mein us ko haal par mere

mera dil us ke gham mein goya us ka dil hai kya jaane

jununi KHabti diwana saDa koi ishq ko samjhe

falatun se nahin yan bahas wo aaqil hai kya jaane

taDapna naqsh-e-pa-e-naqa par jaane hai ek majnun

bayaban mein wo laila ka kidhar mahmil hai kya jaane

paDhaya us ko bahtera ki mat la raaz-e-dil munh par

pe tifl-e-ashk ko dekha to na-qabil hai kya jaane

taraf hona mera mushkil hai 'mir' is sher ke fan mein

yunhin 'sauda' kabhu hota hai so jahil hai kya jaane