مرے اس رک کے مر جانے سے وہ غافل ہے کیا جانے

مرے اس رک کے مر جانے سے وہ غافل ہے کیا جانے

گزرنا جان سے آساں بہت مشکل ہے کیا جانے

کوئی سر سنگ سے مارو کسی کا واپسیں دم ہو

وہ آئینے میں اپنے ناز پر مائل ہے کیا جانے

نظر مطلق نہیں ہجراں میں اس کو حال پر میرے

مرا دل اس کے غم میں گویا اس کا دل ہے کیا جانے

جنونی خبطی دیوانہ سڑا کوئی عشق کو سمجھے

فلاطوں سے نہیں یاں بحث وہ عاقل ہے کیا جانے

تڑپنا نقش پائے ناقہ پر جانے ہے اک مجنوں

بیاباں میں وہ لیلیٰ کا کدھر محمل ہے کیا جانے

پڑھایا اس کو بہتیرا کہ مت لا راز دل منہ پر

پہ طفل اشک کو دیکھا تو نا قابل ہے کیا جانے

طرف ہونا مرا مشکل ہے میرؔ اس شعر کے فن میں

یوں ہیں سوداؔ کبھو ہوتا ہے سو جاہل ہے کیا جانے