mohabbat ne khoya khapaya hamein

mohabbat ne khoyā khapāyā hameñ

bahut un ne DhūñDā na paayā hameñ

phirā karte haiñ dhuup meñ jalte ham

huā hai kahe tū ki saaya hameñ

gahe tar rahīñ gaah ḳhūñ-basta thiiñ

in āñkhoñ ne kyā kyā dikhāyā hameñ

biThā us kī ḳhātir meñ naqsh-e-vafā

nahīñ to uThā le ḳhudāyā hameñ

male Daale hai dil koī ishq meñ

ye kyā rog yā-rab lagāyā hameñ

huī us galī meñ to miTTī aziiz

vale ḳhvāriyoñ se uThāyā hameñ

javānī divānī sunā kyā nahīñ

hasīnoñ kā milnā hī bhāyā hameñ

na samjhī ga.ī dushmanī ishq kī

bahut dostoñ ne jatāyā hameñ

koī dam kal aa.e the majlis meñ 'mīr'

bahut is ġhazal par rulāyā hameñ

mohabbat ne khoya khapaya hamein

bahut un ne DhunDa na paya hamein

phira karte hain dhup mein jalte hum

hua hai kahe tu ki saya hamein

gahe tar rahin gah KHun-basta thin

in aankhon ne kya kya dikhaya hamein

biTha us ki KHatir mein naqsh-e-wafa

nahin to uTha le KHudaya hamein

male Dale hai dil koi ishq mein

ye kya rog ya-rab lagaya hamein

hui us gali mein to miTTi aziz

wale KHwariyon se uThaya hamein

jawani diwani suna kya nahin

hasinon ka milna hi bhaya hamein

na samjhi gai dushmani ishq ki

bahut doston ne jataya hamein

koi dam kal aae the majlis mein 'mir'

bahut is ghazal par rulaya hamein