mujhe to dard se ek uns hai wafa ki qasam

mujhe to dard se ik uns hai vafā kī qasam

yahī sabab hai jo khaa.ī hai maiñ davā kī qasam

kal un ne teġh rakhī darmiyāñ ki qat' hai ab

qasam jo biich meñ aa.ī so us adā kī qasam

hinā lagī tire hāthoñ se maiñ gayā piisā

jigar tamām hai ḳhuuñ mujh ko tere pā kī qasam

faqīr hone ne sab e’tibār khoyā hai

qasam jo khā.ūñ to kahte haiñ kyā gadā kī qasam

qadam tale hī rahā us ke ye sar-e-pur-shor

jo khā.iye to mire tāle’-e-rasā kī qasam

saroñ pe haath kabhū teġh par kabhū us kā

kuchh ek qism nahīñ mere āshnā kī qasam

jidāl dair ke rahbān se kahāñ tak 'mīr'

uTho haram ko chalo ab tumheñ ḳhudā kī qasam

mujhe to dard se ek uns hai wafa ki qasam

yahi sabab hai jo khai hai main dawa ki qasam

kal un ne tegh rakhi darmiyan ki qat' hai ab

qasam jo bich mein aai so us ada ki qasam

hina lagi tere hathon se main gaya pisa

jigar tamam hai KHun mujh ko tere pa ki qasam

faqir hone ne sab e’tibar khoya hai

qasam jo khaun to kahte hain kya gada ki qasam

qadam tale hi raha us ke ye sar-e-pur-shor

jo khaiye to mere tale’-e-rasa ki qasam

saron pe hath kabhu tegh par kabhu us ka

kuchh ek qism nahin mere aashna ki qasam

jidal dair ke rahban se kahan tak 'mir'

uTho haram ko chalo ab tumhein KHuda ki qasam