munh dhote uske aata to hai aksar aaftab

muñh dhote us ke aatā to hai aksar āftāb

khāvegā āftābah koī ḳhud-sar āftāb

sar sadqe tere hone kī ḳhātir bahut hai garm

maarā kare hai shām-o-sahar chakkar āftāb

har ḳhāna kyoñ na sub.h-e-jahāñ meñ ho pur-faroġh

phirtā hai jhāñktā usī ko ghar ghar āftāb

tajrīd kā farāġh hai yak daulat-e-azīm

bhāge hai apne saa.e se bhī ḳhush-tar āftāb

nāzuk mizāj hai tū kahīñ ghar se mat nikal

hotā hai dopahar ke ta.iiñ sar par āftāb

paidā hai roz-e-mashriq-e-nau kī numūd sī

aa.e hai kū-e-yār se bach bach kar āftāb

ho past us ke nuur kā zer-e-zamīñ gayā

har-chand sab sitāroñ se thā bartar āftāb

us ruḳh kī raushnī meñ na ma.alūm kuchh huā

mah gum kidhar huā hai gayā kīdhar āftāb

kis roz-kash kī qaus-e-quzah hai kamān-e-pāk

jis kī uThā sakā na kabhū sesar āftāb

raushan hai ye ki ḳhauf hai us ġhussa-var kā 'mīr'

nikle hai sub.h kāñptā jo tharthar āftāb

munh dhote us ke aata to hai aksar aaftab

khawega aaftabah koi KHud-sar aaftab

sar sadqe tere hone ki KHatir bahut hai garm

mara kare hai sham-o-sahar chakkar aaftab

har KHana kyon na subh-e-jahan mein ho pur-farogh

phirta hai jhankta usi ko ghar ghar aaftab

tajrid ka faragh hai yak daulat-e-azim

bhage hai apne sae se bhi KHush-tar aaftab

nazuk mizaj hai tu kahin ghar se mat nikal

hota hai dopahar ke tain sar par aaftab

paida hai roz-e-mashriq-e-nau ki numud si

aae hai ku-e-yar se bach bach kar aaftab

ho past us ke nur ka zer-e-zamin gaya

har-chand sab sitaron se tha bartar aaftab

us ruKH ki raushni mein na malum kuchh hua

mah gum kidhar hua hai gaya kidhar aaftab

kis roz-kash ki qaus-e-quzah hai kaman-e-pak

jis ki uTha saka na kabhu sesar aaftab

raushan hai ye ki KHauf hai us ghussa-war ka 'mir'

nikle hai subh kanpta jo tharthar aaftab