munh par us aaftab ke hai ye naqab kya

muñh par us āftāb ke hai ye naqāb kyā

parda rahā hai kaun sā ham se hijāb kyā

ai abr-e-tar ye girya hamārā hai dīdanī

barse hai aaj sub.h se chashm-e-pur-āb kyā

dam ginte ginte apnī koī jaan kyoñ na do

vo paas aan baiThe kisū ke hisāb kyā

sau baar us ke kūche talak jaate haiñ chale

dil hai agar bajā to ye hai iztirāb kyā

bas ab na muñh khulāo hamārā Dhake raho

mahshar ko ham savāl kareñ to javāb kyā

dozaḳh so āshiqoñ ko to dozaḳh nahīñ rahā

ab vaañ ga.e pe Thahre hai dekheñ azaab kyā

ham jal ke ek raakh kī Dherī bhī ho ga.e

hai ab takalluf aage jalegā kabāb kyā

hastī hai apne taur pe juuñ bahr josh meñ

girdāb kaisā mauj kahāñ hai habāb kyā

dekhā palak uThā ke to paayā na kuchh asar

ai umr-e-barq-jalva ga.ī tū shitāb kyā

har-chand 'mīr' bastī ke logoñ se hai nufūr

par haa.e aadmī hai vo ḳhāna-ḳharāb kyā

munh par us aaftab ke hai ye naqab kya

parda raha hai kaun sa hum se hijab kya

ai abr-e-tar ye girya hamara hai didani

barse hai aaj subh se chashm-e-pur-ab kya

dam ginte ginte apni koi jaan kyon na do

wo pas aan baiThe kisu ke hisab kya

sau bar us ke kuche talak jate hain chale

dil hai agar baja to ye hai iztirab kya

bas ab na munh khulao hamara Dhake raho

mahshar ko hum sawal karen to jawab kya

dozaKH so aashiqon ko to dozaKH nahin raha

ab wan gae pe Thahre hai dekhen azab kya

hum jal ke ek rakh ki Dheri bhi ho gae

hai ab takalluf aage jalega kabab kya

hasti hai apne taur pe jun bahr josh mein

girdab kaisa mauj kahan hai habab kya

dekha palak uTha ke to paya na kuchh asar

ai umr-e-barq-jalwa gai tu shitab kya

har-chand 'mir' basti ke logon se hai nufur

par hae aadmi hai wo KHana-KHarab kya