munh pe rakhta hai wo naqab bahut

muñh pe rakhtā hai vo naqāb bahut

ham se kartā hai ab hijāb bahut

chashmak-e-gul kā lutf bhī na uThā

kam rahā mausam-e-shabāb bahut

der bhī kuchh lagī na marte hameñ

umr jaatī rahī shitāb bahut

DhūñDte us ko kūche kūche phire

dil ne ham ko kiyā ḳharāb bahut

chalnā apnā qarīb hai shāyad

jaañ kare hai ab iztirāb bahut

tauba mai se bahār meñ na karūñ

go kare shaiḳh ehtisāb bahut

us ġhusaile se kyā kisū kī nibhe

mehrbānī hai kam itaab bahut

kushtan-e-mardumāñ agar hai savāb

to huā hai use savāb bahut

der tak ka.abe meñ the shab behosh

pī ga.e 'mīr' jī sharāb bahut

munh pe rakhta hai wo naqab bahut

hum se karta hai ab hijab bahut

chashmak-e-gul ka lutf bhi na uTha

kam raha mausam-e-shabab bahut

der bhi kuchh lagi na marte hamein

umr jati rahi shitab bahut

DhunDte us ko kuche kuche phire

dil ne hum ko kiya KHarab bahut

chalna apna qarib hai shayad

jaan kare hai ab iztirab bahut

tauba mai se bahaar mein na karun

go kare shaiKH ehtisab bahut

us ghusaile se kya kisu ki nibhe

mehrbani hai kam itab bahut

kushtan-e-marduman agar hai sawab

to hua hai use sawab bahut

der tak kabe mein the shab behosh

pi gae 'mir' ji sharab bahut