na gulshan mein chaman par in ne bulbul tujhko ja di hai

na gulshan meñ chaman par in ne bulbul tujh ko jā dī hai

sipās iizid ke kar jin ne ki ye Daalī navā dī hai

nahīñ Tuk baiThne dete tum apnī bazm meñ ham ko

muravvat rasm thī muddat kī so tum ne uThā dī hai

rihā.ī changul-e-bāz-e-falak se mujh ko mushkil thī

mirī ye band chiḌiyā kī sī maulā ne chhuḌā dī hai

galī meñ apnī qadġhan kar rakho aane na pā.ūñ maiñ

kahīñ kyā aur bhī dil ke lagāne kī munādī hai

tapish se rang uḌā jaave qalaq se jaan ghabrāve

diyā hai dil ilāhī ham ko yā koī balā dī hai

dar-e-gulzār pesh-az-sub.h vā ai bāġhbāñ mat kar

uḌā letī hai miTTī bhī sabā ik chor-bādī hai

koī sūrat nahīñ is ghar se ab tere nikalne kī

qayāmat kī hai jin ne aarsī tujh ko dikhā dī hai

mujhe manzūr kyā hai zulf-o-ḳhāl-o-ḳhatt-e-ḳhūbāñ se

ḳhudā ne dekhne kī lat sī āñkhoñ ko lagā dī hai

kajī-e-zehn is vaadī meñ gumrāhī kī hai bā'is

salīmuttab’ ko to paañv kā har naqsh haadī hai

lagā rahtā hai siine hī se baiThā huuñ ki sotā huuñ

ġharaz chhātī mirī dāġh-e-judā.ī ne jalā dī hai

na chhūTā dil meñ kuchh us ke ga.e par ġhārat-e-ġham se

hazār afsos kyā bastī mohabbat ne luTā dī hai

na kaTtī Tuk na hotī gar faqīrī saath ulfat ke

hameñ jab un ne gaalī dī hai tab ham ne du'ā dī hai

huī hai dil kī mahviyyat se yaksāñ yaañ ġham-o-farhat

na mātam marne kā hai 'mīr' nai jiine kī shādī hai

na gulshan mein chaman par in ne bulbul tujh ko ja di hai

sipas izid ke kar jin ne ki ye Dali nawa di hai

nahin Tuk baiThne dete tum apni bazm mein hum ko

murawwat rasm thi muddat ki so tum ne uTha di hai

rihai changul-e-baz-e-falak se mujh ko mushkil thi

meri ye band chiDiya ki si maula ne chhuDa di hai

gali mein apni qadghan kar rakho aane na paun main

kahin kya aur bhi dil ke lagane ki munadi hai

tapish se rang uDa jawe qalaq se jaan ghabrawe

diya hai dil ilahi hum ko ya koi bala di hai

dar-e-gulzar pesh-az-subh wa ai baghban mat kar

uDa leti hai miTTi bhi saba ek chor-baadi hai

koi surat nahin is ghar se ab tere nikalne ki

qayamat ki hai jin ne aarsi tujh ko dikha di hai

mujhe manzur kya hai zulf-o-KHal-o-KHatt-e-KHuban se

KHuda ne dekhne ki lat si aankhon ko laga di hai

kaji-e-zehn is wadi mein gumrahi ki hai ba'is

salimuttab’ ko to panw ka har naqsh hadi hai

laga rahta hai sine hi se baiTha hun ki sota hun

gharaz chhati meri dagh-e-judai ne jala di hai

na chhuTa dil mein kuchh us ke gae par ghaarat-e-gham se

hazar afsos kya basti mohabbat ne luTa di hai

na kaTti Tuk na hoti gar faqiri sath ulfat ke

hamein jab un ne gali di hai tab hum ne du'a di hai

hui hai dil ki mahwiyyat se yaksan yan gham-o-farhat

na matam marne ka hai 'mir' nai jine ki shadi hai