na KHosha yan na dana yan jalana ghas kya hasil

na ḳhosha yaañ na daana yaañ jalānā ghaas kyā hāsil

tirā ai barq-e-ḳhātif is taraf girnā hai lā-hāsil

sikandar ho ke mālik saat iqlīmoñ kā āḳhir ko

gayā dast-e-tahī le yaañ se ye kuchh kar gayā hāsil

balā qaht-e-murāvat hai ki hai mahsūl galle par

kahīñ se chaar daane laao leveñ jā-ba-jā hāsil

na khīñcheñ kyūñke nuqsāñ ham to qaidī haiñ ta.ayyun ke

ḳhudī se koī nikle to use hove ḳhudā hāsil

ibārat ḳhuub likkhī shā.erī inshā-tarāzī kī

vale matlab hai ġham dekheñ to kab ho mudda.ā hāsil

bahut masrūf-e-kisht-o-kār the mazra' meñ duniyā ke

uThā hasrat se haath āḳhir hameñ ye kuchh huā hāsil

phirā mat 'mīr' sar apnā girāñ-goshoñ kī majlis meñ

sune koī to kuchh kahiye bhī is kahne kā kyā hāsil

na KHosha yan na dana yan jalana ghas kya hasil

tera ai barq-e-KHatif is taraf girna hai la-hasil

sikandar ho ke malik sat iqlimon ka aaKHir ko

gaya dast-e-tahi le yan se ye kuchh kar gaya hasil

bala qaht-e-murawat hai ki hai mahsul galle par

kahin se chaar dane lao lewen ja-ba-ja hasil

na khinchen kyunke nuqsan hum to qaidi hain tayyun ke

KHudi se koi nikle to use howe KHuda hasil

ibarat KHub likkhi shaeri insha-taraazi ki

wale matlab hai gham dekhen to kab ho muddaa hasil

bahut masruf-e-kisht-o-kar the mazra' mein duniya ke

uTha hasrat se hath aaKHir hamein ye kuchh hua hasil

phira mat 'mir' sar apna giran-goshon ki majlis mein

sune koi to kuchh kahiye bhi is kahne ka kya hasil