nala-e-shab ne kiya hai jo asar mat puchho

nāla-e-shab ne kiyā hai jo asar mat pūchho

TukḌe TukḌe huā jaatā hai jigar mat pūchho

pūchhte kyā ho mire dil kā tum ahvāl ki hai

jaise bīmār-e-ajal roz batar mat pūchho

marne meñ band zabāñ honā ishārat hai nadīm

ya.anī hai duur kā darpesh safar mat pūchho

kyā phire vo vatan-āvāra gayā ab so gayā

dil-e-gum-karda kī kuchh ḳhair-ḳhabar mat pūchho

lazzat-e-zahr-e-ġham-e-furqat-e-dil-dārāñ se

hove muñh meñ jinhoñ ke shahd-o-shakar mat pūchho

dil-ḳharāshī-o-jigar-chākī-o-sīna-kāvī

apne nāhaq meñ haiñ sab aur hunar mat pūchho

juuñ tuuñ kar hāl-e-dil ik baar to maiñ arz kiyā

'mīr' sāhib jī bas ab bār-e-digar mat pūchho

nala-e-shab ne kiya hai jo asar mat puchho

TukDe TukDe hua jata hai jigar mat puchho

puchhte kya ho mere dil ka tum ahwal ki hai

jaise bimar-e-ajal roz batar mat puchho

marne mein band zaban hona ishaarat hai nadim

yani hai dur ka darpesh safar mat puchho

kya phire wo watan-awara gaya ab so gaya

dil-e-gum-karda ki kuchh KHair-KHabar mat puchho

lazzat-e-zahr-e-gham-e-furqat-e-dil-daran se

howe munh mein jinhon ke shahd-o-shakar mat puchho

dil-KHarashi-o-jigar-chaaki-o-sina-kawi

apne nahaq mein hain sab aur hunar mat puchho

jun tun kar haal-e-dil ek bar to main arz kiya

'mir' sahib ji bas ab bar-e-digar mat puchho