nazdik aashiqon ke zamin hai qarar-e-ishq

nazdīk āshiqoñ ke zamīñ hai qarār-e-ishq

aur āsmāñ ġhubār sar-e-rahguzār-e-ishq

maqbūl-e-shahr hī nahīñ majnūñ za.īf-o-zār

hai vahshiyān-e-dasht meñ bhī e'tibār-e-ishq

ghar kaise kaise diiñ ke buzurgoñ ke haiñ ḳharāb

al-qissa hai ḳharāba-e-kohna dayār-e-ishq

go zabt karte hoveñ jarāhat jigar ke zaḳhm

rotā nahīñ hai khol ke dil rāzdār-e-ishq

maarā paḌe hai uns hī karne meñ varna 'mīr'

hai daur-gard-e-vādī-e-vahshat shikār-e-ishq

nazdik aashiqon ke zamin hai qarar-e-ishq

aur aasman ghubar sar-e-rahguzar-e-ishq

maqbul-e-shahr hi nahin majnun zaif-o-zar

hai wahshiyan-e-dasht mein bhi e'tibar-e-ishq

ghar kaise kaise din ke buzurgon ke hain KHarab

al-qissa hai KHaraba-e-kohna dayar-e-ishq

go zabt karte howen jarahat jigar ke zaKHm

rota nahin hai khol ke dil raazdar-e-ishq

mara paDe hai uns hi karne mein warna 'mir'

hai daur-gard-e-wadi-e-wahshat shikar-e-ishq