qabr-e-ashiq par muqarrar roz aana kijiye

qabr-e-āshiq par muqarrar roz aanā kījiye

jo gayā ho jaan se us ko bhī jaanā kījiye

raat daarū pījiye ġhairoñ meñ be-lait-o-la.al

yaañ sahar sar dukhne kā ham se bahāna kījiye

Tuk tumhāre hoñT ke hilne se yaañ hotā hai kaam

itnī utnī baat jo hove to maanā kījiye

gosha-e-chashm-e-butāñ yā kunj-e-lab is vaqt meñ

jā kahīñ ho to dil apne kā Thikānā kījiye

sīkhiye ġhairoñ ke haañ chhup-chhup ke ilm-e-tīr phir

saare aalam meñ hamāre tiiñ nishāna kījiye

rafta rafta qāsidoñ ko raftagī us se huī

jī meñ hai ab ke muqarrar apnā jaanā kījiye

nikle hai āñkhoñ se to gard-e-kudūrat jā-e-ashk

tā-kujā terī galī meñ ḳhaak chhānā kījiye

ābshār aane lage aañsū ke palkoñ se to 'mīr'

kab talak ye āb-chādar muñh pe taanā kījiye

qabr-e-ashiq par muqarrar roz aana kijiye

jo gaya ho jaan se us ko bhi jaana kijiye

raat daru pijiye ghairon mein be-lait-o-lal

yan sahar sar dukhne ka hum se bahana kijiye

Tuk tumhaare honT ke hilne se yan hota hai kaam

itni utni baat jo howe to mana kijiye

gosha-e-chashm-e-butan ya kunj-e-lab is waqt mein

ja kahin ho to dil apne ka Thikana kijiye

sikhiye ghairon ke han chhup-chhup ke ilm-e-tir phir

sare aalam mein hamare tin nishana kijiye

rafta rafta qasidon ko raftagi us se hui

ji mein hai ab ke muqarrar apna jaana kijiye

nikle hai aankhon se to gard-e-kudurat ja-e-ashk

ta-kuja teri gali mein KHak chhana kijiye

aabshaar aane lage aansu ke palkon se to 'mir'

kab talak ye aab-chadar munh pe tana kijiye