qissa kahen to kya kahen milne ki raat ka

qissa kaheñ to kyā kaheñ milne kī raat kā

pahroñ chuvāo un ne rakhā baat baat kā

jur.at se garche zard huuñ par māntā hai kaun

muñh laal jab talak na karūñ pāñch saat kā

kyūñkar basar kare ġham-o-ġhussa meñ hijr ke

ḳhūgar jo ho kisū ke koī iltifāt kā

jāgah se le gayā hameñ us kā ḳhirām-e-nāz

Thahrāv ho sakā na qarār-o-sabāt kā

Dartā huuñ mālikān-e-jazā chhātī dekh kar

kahne lageñ na vaah re zaḳhm us ke haath kā

vā’iz kahe so sach hai vale mai-farosh se

ham zikr bhī sunā nahīñ saum-o-salāt kā

bhauñkā kareñ raqīb paḌe kū-e-yār meñ

kis ke ta.iiñ dimāġh-e-afaf hai sagāt kā

un hoñToñ kā harīf ho zulmāt meñ gayā

parde meñ rū-siyāh hai āb-e-hayāt kā

'ālam kisū hakīm kā bāñdhā tilism hai

kuchh ho to e'tibār bhī ho kā.enāt kā

gar yaar 'mīr' ahl hai to kaam sahl hai

andesha tujh ko yūñhī hai apnī najāt kā

qissa kahen to kya kahen milne ki raat ka

pahron chuwao un ne rakha baat baat ka

jurat se garche zard hun par manta hai kaun

munh lal jab talak na karun panch sat ka

kyunkar basar kare gham-o-ghussa mein hijr ke

KHugar jo ho kisu ke koi iltifat ka

jagah se le gaya hamein us ka KHiram-e-naz

Thahraw ho saka na qarar-o-sabaat ka

Darta hun malikan-e-jaza chhati dekh kar

kahne lagen na wah re zaKHm us ke hath ka

wa’iz kahe so sach hai wale mai-farosh se

hum zikr bhi suna nahin saum-o-salat ka

bhaunka karen raqib paDe ku-e-yar mein

kis ke tain dimagh-e-afaf hai sagat ka

un honTon ka harif ho zulmat mein gaya

parde mein ru-siyah hai aab-e-hayat ka

'alam kisu hakim ka bandha tilism hai

kuchh ho to e'tibar bhi ho kaenat ka

gar yar 'mir' ahl hai to kaam sahl hai

andesha tujh ko yunhi hai apni najat ka