rabta baham hai koi din ka yan

rābta bāham hai koī din kā yaañ

phir zamāne meñ kahāñ tum ham kahāñ

gum huā huuñ yaañ se jā kar maiñ jahāñ

kuchh nahīñ paidā kahāñ merā nishāñ

piirī meñ hai tifl-e-maktab sā juhūl

hai falak karne ke qābil āsmāñ

tū kahe vaañ nā-gahāñ bijlī girī

vo nigāh-e-tund kartā hai jahāñ

bhūle bhī maiñ yak nazar dekhā nahīñ

us pe hai vo be-dimāġh o bad-gumāñ

'ishq ne taklīf kī mā-lā-yutāq

baar amānat kā girāñ maiñ nā-tavāñ

kaam kuchh aa.ī na dil kī bhī kashish

khiñch rahā hai ham se vo abrū-kamāñ

kyā chhupī haiñ bāteñ mere 'ishq kī

dāstāñ-dar-dāstāñ hai dāstāñ

'ishq meñ kyūñkar basar kariyegā 'umr

dil lagā hai jis se so nā-mehrbāñ

jo zamīñ pā-laġhz thī shāyad ki 'mīr'

ho vahīñ masjūd us kā āstāñ

rabta baham hai koi din ka yan

phir zamane mein kahan tum hum kahan

gum hua hun yan se ja kar main jahan

kuchh nahin paida kahan mera nishan

piri mein hai tifl-e-maktab sa juhul

hai falak karne ke qabil aasman

tu kahe wan na-gahan bijli giri

wo nigah-e-tund karta hai jahan

bhule bhi main yak nazar dekha nahin

us pe hai wo be-dimagh o bad-guman

'ishq ne taklif ki ma-la-yutaq

bar amanat ka giran main na-tawan

kaam kuchh aai na dil ki bhi kashish

khinch raha hai hum se wo abru-kaman

kya chhupi hain baaten mere 'ishq ki

dastan-dar-dastan hai dastan

'ishq mein kyunkar basar kariyega 'umr

dil laga hai jis se so na-mehrban

jo zamin pa-laghz thi shayad ki 'mir'

ho wahin masjud us ka aastan