rah jaun chup na kyunke bura ji mein man kar

rah jā.ūñ chup na kyūñke burā jī meñ maan kar

aao bhalā kabhū to so jaao zabān kar

kahte haiñ chalte vaqt mulāqāt hai zarūr

jaate haiñ ham bhī jaan se Tuk dekho aan kar

kyā lutf thā ki mai-kade kī pusht-e-bām par

sote the mast chādar-e-mahtāb taan kar

aaya na chal ke yaañ ta.iiñ vo bā.is-e-hayāt

maarā hai un ne jaan se ham ko to jaan kar

aise hī tez-dast ho ḳhūñ-rezī meñ to phir

rakkhoge teġh jaur kī yak-chand myaan kar

ye be-muravvatī ki nigah kā muzā.iqa

itnā to merī jaan na mujh se siyān kar

rangīn gor karnī shahīdoñ kī rasm hai

tū bhī hamārī ḳhaak pe ḳhuuñ ke nishān kar

rakhnā thā vaqt-e-qatl mirā imtiyāz haa.e

so ḳhaak meñ milāyā mujhe sab meñ saan kar

tum teġh-e-jaur khīñch ke kyā soch meñ ga.e

marnā hī apnā jī meñ ham aa.e haiñ Thaan kar

ve din ga.e ki tāqat-e-dil kā thā e'timād

ab yuuñ khaḌe khaḌe na mirā imtihān kar

us gauhar-e-murād ko paayā na ham ne 'mīr'

pāyān-e-kār mar ga.e yuuñ ḳhaak chhān kar

rah jaun chup na kyunke bura ji mein man kar

aao bhala kabhu to so jao zaban kar

kahte hain chalte waqt mulaqat hai zarur

jate hain hum bhi jaan se Tuk dekho aan kar

kya lutf tha ki mai-kade ki pusht-e-baam par

sote the mast chadar-e-mahtab tan kar

aaya na chal ke yan tain wo bais-e-hayat

mara hai un ne jaan se hum ko to jaan kar

aise hi tez-dast ho KHun-rezi mein to phir

rakkhoge tegh jaur ki yak-chand myan kar

ye be-murawwati ki nigah ka muzaiqa

itna to meri jaan na mujh se siyan kar

rangin gor karni shahidon ki rasm hai

tu bhi hamari KHak pe KHun ke nishan kar

rakhna tha waqt-e-qatl mera imtiyaz hae

so KHak mein milaya mujhe sab mein san kar

tum tegh-e-jaur khinch ke kya soch mein gae

marna hi apna ji mein hum aae hain Than kar

we din gae ki taqat-e-dil ka tha e'timad

ab yun khaDe khaDe na mera imtihan kar

us gauhar-e-murad ko paya na hum ne 'mir'

payan-e-kar mar gae yun KHak chhan kar