raha main to izzat ka eazaz karta

rahā maiñ to izzat kā e.azāz kartā

chalā ishq ḳhvārī ko mumtāz kartā

na hotā maiñ hasrat meñ muhtāj-e-girya

jo kuchh āñsuoñ ko pas-andāz kartā

na Thahrā mire paas dil varna ab tak

use aisā hī maiñ to jāñbāz kartā

jo jānūñ ki darpe hai aisā vo dushman

to kaahe ko ulfat se maiñ saaz kartā

tū tamkīn se kuchh na bolā vagarna

masīhā sanam tark e.ajāz kartā

gulū-gīr hī ho ga.ī yāva-goī

rahā maiñ ḳhamoshī ko āvāz kartā

ziyārat-gah-e-kabk tū ho balā se

Tuk aa 'mīr' kī ḳhaak par naaz kartā

raha main to izzat ka eazaz karta

chala ishq KHwari ko mumtaz karta

na hota main hasrat mein muhtaj-e-girya

jo kuchh aansuon ko pas-andaz karta

na Thahra mere pas dil warna ab tak

use aisa hi main to jaanbaz karta

jo jaanun ki darpe hai aisa wo dushman

to kahe ko ulfat se main saz karta

tu tamkin se kuchh na bola wagarna

masiha sanam tark eajaz karta

gulu-gir hi ho gai yawa-goi

raha main KHamoshi ko aawaz karta

ziyarat-gah-e-kabk tu ho bala se

Tuk aa 'mir' ki KHak par naz karta