rahe hai ghash-o-dard do do pahar tak

rahe hai ġhash-o-dard do do pahar tak

sar-e-zaḳhm pahuñchā hai shāyad jigar tak

hue haiñ havās aur hosh-o-ḳhirad gum

ḳhabar kuchh to aa.ī hai us be-ḳhabar tak

zamīñ-gard us mah ke mere haiñ āshiq

sitāre falak ke rahe haiñ idhar tak

qayāmat hai mushtāq logoñ kī kasrat

pahuñchnā hai mushkil hameñ us ke ghar tak

kahāñ tak use sar se maarā karūñ maiñ

na pahuñchā mirā haath us kī kamar tak

bahār aa.ī par ek pattī bhī gul kī

na aa.ī asīrān-e-be-bāl-o-par tak

bahut 'mīr' barham jahāñ meñ raheñge

agar rah ga.e aaj shab kī sahar tak

rahe hai ghash-o-dard do do pahar tak

sar-e-zaKHm pahuncha hai shayad jigar tak

hue hain hawas aur hosh-o-KHirad gum

KHabar kuchh to aai hai us be-KHabar tak

zamin-gard us mah ke mere hain aashiq

sitare falak ke rahe hain idhar tak

qayamat hai mushtaq logon ki kasrat

pahunchna hai mushkil hamein us ke ghar tak

kahan tak use sar se mara karun main

na pahuncha mera hath us ki kamar tak

bahaar aai par ek patti bhi gul ki

na aai asiran-e-be-baal-o-par tak

bahut 'mir' barham jahan mein rahenge

agar rah gae aaj shab ki sahar tak