rahe KHayal tanik hum bhi ru-siyahon ka

rahe ḳhayāl tanik ham bhī rū-siyāhoñ kā

lage ho ḳhuun bahut karne be-gunāhoñ kā

nahīñ sitāre ye sūrāḳh paḌ ga.e haiñ tamām

falak harīf huā thā hamārī aahoñ kā

galī meñ us kī phaTe kapḌoñ par mire mat jā

libās-e-faqr hai vaañ faḳhr bādshāhoñ kā

tamām zulf ke kūche haiñ mār-e-pech us kī

tujhī ko aave dilā chalnā aisī rāhoñ kā

usī jo ḳhūbī se laa.e tujhe qayāmat meñ

to harf-e-kun ne kiyā gosh dād-ḳhvāhoñ kā

tamām-umr raheñ ḳhaak zer-e-pā us kī

jo zor kuchh chale ham ijz dast-gāhoñ kā

kahāñ se tah kareñ paidā ye nāzimān-e-hāl

ki poch-bāfī hī hai kaam in julāhoñ kā

hisāb kaahe kā roz-e-shumār meñ mujh se

shumār hī nahīñ hai kuchh mire gunāhoñ kā

tirī jo āñkheñ haiñ talvār ke tale bhī idhar

fareb-ḳhurda hai tū 'mīr' kin nigāhoñ kā

rahe KHayal tanik hum bhi ru-siyahon ka

lage ho KHun bahut karne be-gunahon ka

nahin sitare ye suraKH paD gae hain tamam

falak harif hua tha hamari aahon ka

gali mein us ki phaTe kapDon par mere mat ja

libas-e-faqr hai wan faKHr baadshahon ka

tamam zulf ke kuche hain mar-e-pech us ki

tujhi ko aawe dila chalna aisi rahon ka

usi jo KHubi se lae tujhe qayamat mein

to harf-e-kun ne kiya gosh dad-KHwahon ka

tamam-umr rahen KHak zer-e-pa us ki

jo zor kuchh chale hum ijz dast-gahon ka

kahan se tah karen paida ye naziman-e-haal

ki poch-bafi hi hai kaam in julahon ka

hisab kahe ka roz-e-shumar mein mujh se

shumar hi nahin hai kuchh mere gunahon ka

teri jo aankhen hain talwar ke tale bhi idhar

fareb-KHurda hai tu 'mir' kin nigahon ka