rahiye baghair tere ai rashk-e-mah ta-chand

rahiye baġhair tere ai rashk-e-māh tā-chand

āñkhoñ meñ yuuñ hamārī aalam siyāh tā-chand

ab dekhne meñ pyāre Tuk to baḌhā ināyat

kotāh-tar palak se īdhar nigāh tā-chand

ḳhat se jo hai girafta vo mah nahīñ nikaltā

mānind-e-chashm-e-aḳhtar ham dekheñ raah tā-chand

umr-e-azīz saarī minnat hī karte guzrī

be-jurm aah rahiye yuuñ uzr-ḳhvāh tā-chand

yaañ nāz-o-sar-kashī se kyā dekhtā nahīñ hai

kaj is chaman meñ Thahrī gul kī kulāh tā-chand

jab mah udhar se niklā jaanā vo ghar se niklā

rakhtā hai daaġh dekheñ ye ishtibāh tā-chand

iizā bhī khiñch chuke gar jo hafte ashre kī ho

is tarah marte rahiye ai 'mīr' aah tā-chand

rahiye baghair tere ai rashk-e-mah ta-chand

aankhon mein yun hamari aalam siyah ta-chand

ab dekhne mein pyare Tuk to baDha inayat

kotah-tar palak se idhar nigah ta-chand

KHat se jo hai girafta wo mah nahin nikalta

manind-e-chashm-e-aKHtar hum dekhen rah ta-chand

umr-e-aziz sari minnat hi karte guzri

be-jurm aah rahiye yun uzr-KHwah ta-chand

yan naz-o-sar-kashi se kya dekhta nahin hai

kaj is chaman mein Thahri gul ki kulah ta-chand

jab mah udhar se nikla jaana wo ghar se nikla

rakhta hai dagh dekhen ye ishtibah ta-chand

iza bhi khinch chuke gar jo hafte ashre ki ho

is tarah marte rahiye ai 'mir' aah ta-chand