rakkha gunah wafa ka taqsir kya nikali

rakkhā gunah vafā kā taqsīr kyā nikālī

maarā ḳharāb kar kar ta.azīr kyā nikālī

rahtī hai chit chaḌhī hī din-rāt terī sūrat

safhe pe dil ke maiñ ne tasvīr kyā nikālī

chup bhī mirī jatā.ī us se muḳhālifoñ ne

baat aur jab banā.ī taqrīr kyā nikālī

bas thī hameñ to terī abrū kī ek jumbish

ḳhūñ-rezī ko hamārī shamshīr kyā nikālī

kī us tabīb-e-jāñ ne tajvīz marg-e-āshiq

āzār ke munāsib tadbīr kyā nikālī

dil band hai hamārā mauj-e-havā-e-gul se

ab ke junūñ meñ ham ne zanjīr kyā nikālī

naame pe lohū ro ro ḳhat khīñch Daale saare

ye 'mīr' baiThe baiThe tahrīr kyā nikālī

rakkha gunah wafa ka taqsir kya nikali

mara KHarab kar kar tazir kya nikali

rahti hai chit chaDhi hi din-raat teri surat

safhe pe dil ke main ne taswir kya nikali

chup bhi meri jatai us se muKHalifon ne

baat aur jab banai taqrir kya nikali

bas thi hamein to teri abru ki ek jumbish

KHun-rezi ko hamari shamshir kya nikali

ki us tabib-e-jaan ne tajwiz marg-e-ashiq

aazar ke munasib tadbir kya nikali

dil band hai hamara mauj-e-hawa-e-gul se

ab ke junun mein hum ne zanjir kya nikali

name pe lohu ro ro KHat khinch Dale sare

ye 'mir' baiThe baiThe tahrir kya nikali