rote hain nala-kash hain ya raat din jale hain

rote haiñ nāla-kash haiñ yā raat din jale haiñ

hijrāñ meñ us ke ham ko bahutere mashġhale haiñ

juuñ duud umr guzrī sab pech-o-tāb hī meñ

itnā satā na zālim ham bhī jale bale haiñ

marnā hai ḳhaak honā ho ḳhaak uḌte phirnā

is raah meñ abhī to darpesh marhale haiñ

kis din chaman meñ yā-rab hogī sabā gul-afshāñ

kitne shikasta-par ham dīvār ke tale haiñ

jab yaad aa ga.e haiñ pā-e-hinā.ī us ke

afsos se tab apne ham haath hī male haiñ

thā jo mizāj apnā so to kahāñ rahā hai

par nisbat aglī to bhī ham in dinoñ bhale haiñ

kuchh vo jo khiñch rahā hai ham kāñpte haiñ Dar se

yaañ jūñ-kamān ghar meñ har-vaqt zalzale haiñ

ik shor hī rahā hai dīvān-pan meñ apne

zanjīr se hile haiñ gar kuchh bhī ham hile haiñ

past-o-buland dekheñ kyā 'mīr' pesh aa.e

is dasht se ham ab to sailāb se chale haiñ

rote hain nala-kash hain ya raat din jale hain

hijran mein us ke hum ko bahutere mashghale hain

jun dud umr guzri sab pech-o-tab hi mein

itna sata na zalim hum bhi jale bale hain

marna hai KHak hona ho KHak uDte phirna

is rah mein abhi to darpesh marhale hain

kis din chaman mein ya-rab hogi saba gul-afshan

kitne shikasta-par hum diwar ke tale hain

jab yaad aa gae hain pa-e-hinai us ke

afsos se tab apne hum hath hi male hain

tha jo mizaj apna so to kahan raha hai

par nisbat agli to bhi hum in dinon bhale hain

kuchh wo jo khinch raha hai hum kanpte hain Dar se

yan jun-kaman ghar mein har-waqt zalzale hain

ek shor hi raha hai diwan-pan mein apne

zanjir se hile hain gar kuchh bhi hum hile hain

past-o-buland dekhen kya 'mir' pesh aae

is dasht se hum ab to sailab se chale hain