sab kaam saunp usko jo kuchh kaam bhi chale

sab kaam sauñp us ko jo kuchh kaam bhī chale

jap naam us kā sub.h ko tā naam bhī chale

gul bikhre laal mere qafas par ḳhizāñ kī baav

shāyad ki ab bahār ke ayyām bhī chale

ḳhat nikle par bhī yaar na likhtā thā koī harf

so us ko ab to logoñ ke paiġhām bhī chale

saaya sī us ke pīchhe lagī phirtī hai parī

vo kyā jo aage yaar ke do-gām bhī chale

phir sā'va ke ḳhirām kī be-lutfī dekhiyo

jab raah do qadam vo gul-andām bhī chale

ab vo nahīñ ki thāme thame iztirār hai

ik 'umr ham to haath se dil thaam bhī chale

ye rāh-e-dūr-e-ishq nahīñ hotī 'mīr' tai

ham sub.h bhī chale ga.e haiñ shaam bhī chale

sab kaam saunp us ko jo kuchh kaam bhi chale

jap nam us ka subh ko ta nam bhi chale

gul bikhre lal mere qafas par KHizan ki baw

shayad ki ab bahaar ke ayyam bhi chale

KHat nikle par bhi yar na likhta tha koi harf

so us ko ab to logon ke paigham bhi chale

saya si us ke pichhe lagi phirti hai pari

wo kya jo aage yar ke do-gam bhi chale

phir sa'wa ke KHiram ki be-lutfi dekhiyo

jab rah do qadam wo gul-andam bhi chale

ab wo nahin ki thame thame iztirar hai

ek 'umr hum to hath se dil tham bhi chale

ye rah-e-dur-e-ishq nahin hoti 'mir' tai

hum subh bhi chale gae hain sham bhi chale