said-afganon se milne ki tadbir karenge

said-afganoñ se milne kī tadbīr kareñge

is dil ke ta.iiñ pesh-kash-e-tīr kareñge

fariyād-e-asīrān-e-mohabbat nahīñ be-hech

ye naale kisū dil meñ bhī tāsīr kareñge

dīvāngī kī shorisheñ dikhlā.eñge bulbul

aatī hai bahār ab hameñ zanjīr kareñge

vā us se sar-e-harf to ho go ki ye sar jaa.e

ham halq-e-burīda hī se taqrīr kareñge

rusvā.ī-e-āshiq se tasallī nahīñ ḳhūbāñ

mar jāvegā to na.ash ko tash.hīr kareñge

yā-rab vo bhī din ho.egā jo misr se chal kar

kan.āñ kī taraf qāfile shab-gīr kareñge

har-chand ki in turkoñ meñ ho jald-mizājī

par kaam meñ milne ke ye tāḳhīr kareñge

shab dekhī hai zulf us kī ba-juz dām-e-asīrī

kyā yaar ab is ḳhvāb kī ta.abīr kareñge

ġhusse meñ to hovegī tavajjoh tirī īdhar

har kaam meñ ham jaan ke taqsīr kareñge

niklā na munājātiyoñ se kaam kuchh apnā

ab koī ḳharābātī javāñ piir kareñge

mukhḌe ke tire dekhne vāloñ ke muqābil

lāvegā koī mah ko to ta.azīr kareñge

shaiḳhoñ ke na jā sub.ha-o-sajjāda pe hargiz

maqdūr talak apne ye tazvīr kareñge

bāzīcha nahīñ 'mīr' ke ahvāl kā likhnā

is qisse ko ham karte hī tahrīr kareñge

said-afganon se milne ki tadbir karenge

is dil ke tain pesh-kash-e-tir karenge

fariyaad-e-asiran-e-mohabbat nahin be-hech

ye nale kisu dil mein bhi tasir karenge

diwangi ki shorishen dikhlaenge bulbul

aati hai bahaar ab hamein zanjir karenge

wa us se sar-e-harf to ho go ki ye sar jae

hum halq-e-burida hi se taqrir karenge

ruswai-e-ashiq se tasalli nahin KHuban

mar jawega to nash ko tashhir karenge

ya-rab wo bhi din hoega jo misr se chal kar

kanan ki taraf qafile shab-gir karenge

har-chand ki in turkon mein ho jald-mizaji

par kaam mein milne ke ye taKHir karenge

shab dekhi hai zulf us ki ba-juz dam-e-asiri

kya yar ab is KHwab ki tabir karenge

ghusse mein to howegi tawajjoh teri idhar

har kaam mein hum jaan ke taqsir karenge

nikla na munajatiyon se kaam kuchh apna

ab koi KHarabaati jawan pir karenge

mukhDe ke tere dekhne walon ke muqabil

lawega koi mah ko to tazir karenge

shaiKHon ke na ja subha-o-sajjada pe hargiz

maqdur talak apne ye tazwir karenge

bazicha nahin 'mir' ke ahwal ka likhna

is qisse ko hum karte hi tahrir karenge