sau KHun-chakan gile hain lab se meri zaban tak

sau ḳhūñ-chakāñ gile haiñ lab se mirī zabāñ tak

jī ruñdh gayā hai zālim ab rahm kar kahāñ tak

milne meñ mere gaahe Tuk tan diyā na un ne

hāzir rahā huuñ maiñ to apnī taraf se jaañ tak

har-chand maiñ ne sar par is rah kī ḳhaak Daalī

lekin na pahuñchīñ āñkheñ us paañv ke nishāñ tak

in haDDiyoñ kā jalnā koī humā se pūchho

laatā nahīñ hai muñh vo ab mere ustuḳhvāñ tak

us kī galī ke sag se kī hai muvāfaqat maiñ

is raah se bhī pahuñcheñ shāyad ki pāsbāñ tak

abr-e-bahār ne shab dil ko bahut jalāyā

thā barq kā chamaknā ḳhāshāk-e-āshiyāñ tak

us mah ke gosh tak to hargiz nahīñ pahuñchtī

go aah be-sarāyat jaatī hai āsmāñ tak

qaid-e-qafas meñ marnā kab shauq kā hai maane

pahuñcheñge musht-e-par bhī uḌ kar ye gulsitāñ tak

honā jahāñ kā apnī āñkhoñ meñ hai na honā

aatā nazar nahīñ kuchh jaave nazar jahāñ tak

jaatī haiñ ḳhat ke pīchhe juuñ muhr āñkheñ merī

ab kār-e-shauq merā pahuñchā hai 'mīr' yaañ tak

sau KHun-chakan gile hain lab se meri zaban tak

ji rundh gaya hai zalim ab rahm kar kahan tak

milne mein mere gahe Tuk tan diya na un ne

hazir raha hun main to apni taraf se jaan tak

har-chand main ne sar par is rah ki KHak Dali

lekin na pahunchin aankhen us panw ke nishan tak

in haDDiyon ka jalna koi huma se puchho

lata nahin hai munh wo ab mere ustuKHwan tak

us ki gali ke sag se ki hai muwafaqat main

is rah se bhi pahunchen shayad ki pasban tak

abr-e-bahaar ne shab dil ko bahut jalaya

tha barq ka chamakna KHashak-e-ashiyan tak

us mah ke gosh tak to hargiz nahin pahunchti

go aah be-sarayat jati hai aasman tak

qaid-e-qafas mein marna kab shauq ka hai mane

pahunchenge musht-e-par bhi uD kar ye gulsitan tak

hona jahan ka apni aankhon mein hai na hona

aata nazar nahin kuchh jawe nazar jahan tak

jati hain KHat ke pichhe jun muhr aankhen meri

ab kar-e-shauq mera pahuncha hai 'mir' yan tak