shaista-e-gham-o-sitam-e-yar hum hue

shā.ista-e-ġham-o-sitam-e-yār ham hue

āshiq kahāñ hue ki gunahgār ham hue

kī arz jo matā.a-e-amānat azal ke biich

sab aur le sake na ḳharīdār ham hue

jī khiñch gayā asīr-e-qafas kī fuġhāñ kī or

thī choT apne dil ko giraftār ham hue

pāmāl yuuñ kiyā ki barābar haiñ ḳhaak ke

kyā zulm ho gayā jo talabgār ham hue

hotā nahīñ hai be-ḳhabarī kā ma.aal ḳhuub

afsos hai ki der ḳhabar-dār ham hue

vasl us tabīb-zāde kā jī chāhtā rahā

āḳhir is aarzū hī meñ bīmār ham hue

phal hai ye 'mīr' ishq kā us nau-bahār ke

āḳhir jo kusht-o-ḳhūñ ke sazā-vār ham hue

shaista-e-gham-o-sitam-e-yar hum hue

aashiq kahan hue ki gunahgar hum hue

ki arz jo mataa-e-amanat azal ke bich

sab aur le sake na KHaridar hum hue

ji khinch gaya asir-e-qafas ki fughan ki or

thi choT apne dil ko giraftar hum hue

pamal yun kiya ki barabar hain KHak ke

kya zulm ho gaya jo talabgar hum hue

hota nahin hai be-KHabari ka maal KHub

afsos hai ki der KHabar-dar hum hue

wasl us tabib-zade ka ji chahta raha

aaKHir is aarzu hi mein bimar hum hue

phal hai ye 'mir' ishq ka us nau-bahaar ke

aaKHir jo kusht-o-KHun ke saza-war hum hue