shab agar dil-KHwah apne be-qarari kijiye

shab agar dil-ḳhvāh apne be-qarārī kījiye

le zamīñ se tā-falak fariyād-o-zārī kījiye

ek din ho to kareñ ahvāl-gīrī dil kī aah

mar ga.e ham kab talak tīmārdārī kījiye

nochiye nāḳhun se muñh yā chaak kariye sab jigar

jī meñ hai aage tire kuchh dast-kārī kījiye

jā.iye is shahr hī se ab garebāñ phaaḌ kar

kījiye kyā ġham se yuuñ mātam-guzārī kījiye

yuuñ bane kab tak ki be-lāl-e-lab us ke har ghaḌī

chashma-chashma ḳhūn-e-dil āñkhoñ se jaarī kījiye

kunj-e-lab us shoḳh kā bhī rījhne kī jaa.e hai

sarf kiije umr to us jaa.e saarī kījiye

koh-e-ġham sar par uThā liije na kahiye muñh se kuchh

ishq meñ juuñ kohkan kuchh burdbārī kījiye

garche jī kab chāhtā hai aap kā aane ko yaañ

par kabhū to ā.īye ḳhātir hamārī kījiye

āshnā ho us se ham mar-mar ga.e ā.inda 'mīr'

jiite rahiye to kisū se ab na yaarī kījiye

shab agar dil-KHwah apne be-qarari kijiye

le zamin se ta-falak fariyaad-o-zari kijiye

ek din ho to karen ahwal-giri dil ki aah

mar gae hum kab talak timardari kijiye

nochiye naKHun se munh ya chaak kariye sab jigar

ji mein hai aage tere kuchh dast-kari kijiye

jaiye is shahr hi se ab gareban phaD kar

kijiye kya gham se yun matam-guzari kijiye

yun bane kab tak ki be-lal-e-lab us ke har ghaDi

chashma-chashma KHun-e-dil aankhon se jari kijiye

kunj-e-lab us shoKH ka bhi rijhne ki jae hai

sarf kije umr to us jae sari kijiye

koh-e-gham sar par uTha lije na kahiye munh se kuchh

ishq mein jun kohkan kuchh burdbari kijiye

garche ji kab chahta hai aap ka aane ko yan

par kabhu to aaiye KHatir hamari kijiye

aashna ho us se hum mar-mar gae aainda 'mir'

jite rahiye to kisu se ab na yari kijiye