shor mere junun ka jis ja hai

shor mere junūñ kā jis jā hai

daḳhl-e-aql us maqām meñ kyā hai

dil meñ phirte haiñ ḳhāl-o-ḳhatt-o-zulf

mujh ko yaksar hazār saudā hai

shor bāzār meñ hai yūsuf kā

vo bhī aa nikle to tamāshā hai

barchhiyoñ meñ kahīñ na baT jaave

dil sufūf-e-mizha meñ tanhā hai

nazar aa.e the ve hinā.ī pā

aaj tak fitna ek barpā hai

dil khiñche jaate haiñ usī kī or

saare aalam kī vo tamanna hai

barsoñ rakkhā hai dīda-e-tar par

paaT dāman kā apne dariyā hai

Tuk garebāñ meñ sar ko Daal ke dekh

dil bhī dāman-vasī.a sahrā hai

dilkashī us ke qad kī sī ma.alūm

sarv bhī ik javān rā.anā hai

dast-o-pā gum kiye haiñ tū ne 'mīr'

piirī be-tāqatī se paidā hai

shor mere junun ka jis ja hai

daKHl-e-aql us maqam mein kya hai

dil mein phirte hain KHal-o-KHatt-o-zulf

mujh ko yaksar hazar sauda hai

shor bazar mein hai yusuf ka

wo bhi aa nikle to tamasha hai

barchhiyon mein kahin na baT jawe

dil sufuf-e-mizha mein tanha hai

nazar aae the we hinai pa

aaj tak fitna ek barpa hai

dil khinche jate hain usi ki or

sare aalam ki wo tamanna hai

barson rakkha hai dida-e-tar par

paT daman ka apne dariya hai

Tuk gareban mein sar ko Dal ke dekh

dil bhi daman-wasia sahra hai

dilkashi us ke qad ki si malum

sarw bhi ek jawan raana hai

dast-o-pa gum kiye hain tu ne 'mir'

piri be-taqati se paida hai