shorida sar rakha hai jab se us aastan par

shorīda sar rakhā hai jab se us āstāñ par

merā dimāġh tab se hai haftum āsmāñ par

ghāyal girā rahā hai fitrāk se bañdhā hai

kyā kyā sitam hue haiñ is said-e-nā-tavāñ par

lutf-e-badan ko us ke hargiz pahuñch sake na

jā paḌtī thī hamesha apnī nigāh jaañ par

ḳhāshāk o ḳhaar o ḳhas ko kar ek jā jalāyā

kyā chashm-e-shor barq-e-ḳhātif thī āshiyāñ par

vo bāġhbāñ-pisar kuchh gul gul shagufta hai ab

ye aur gul khilā hai ik phūloñ kī dukāñ par

parkāle aag ke the kyā nāla-hā-e-bulbul

shabnam se aable haiñ gul-barg sī zabāñ par

dil kyā makāñ phir us kā kyā sahn 'mīr' lekin

ġhālib hai sa'ī meñ to maidān-e-lā-makāñ par

shorida sar rakha hai jab se us aastan par

mera dimagh tab se hai haftum aasman par

ghayal gira raha hai fitrak se bandha hai

kya kya sitam hue hain is said-e-na-tawan par

lutf-e-badan ko us ke hargiz pahunch sake na

ja paDti thi hamesha apni nigah jaan par

KHashak o KHar o KHas ko kar ek ja jalaya

kya chashm-e-shor barq-e-KHatif thi aashiyan par

wo baghban-pisar kuchh gul gul shagufta hai ab

ye aur gul khila hai ek phulon ki dukan par

parkale aag ke the kya nala-ha-e-bulbul

shabnam se aable hain gul-barg si zaban par

dil kya makan phir us ka kya sahn 'mir' lekin

ghaalib hai sa'i mein to maidan-e-la-makan par