suna jata hai ai ghatiye tere majlis-nashinon se

sunā jaatā hai ai ghatiye tire majlis-nashīnoñ se

ki tū daarū piye hai raat ko mil kar kamīnoñ se

ga.ī garm-iḳhtilātī kab kī un sehr-āfrīnoñ se

lage rahte haiñ dāġh-e-hijr hī ab apne sīnoñ se

gale lag kar na yak shab kaash vo mah so gayā hotā

mirī chhātī jalā kartī hai ab kitne mahīnoñ se

ḳhudā jaane hai apnā to jigar kāñpā hī kartā hai

chaḌhī tyorī se mahbūboñ kī or abrū kī chīnoñ se

bahut kotāh-dāman ḳhirqe shaiḳhoñ ke phaTe paa.e

kahīñ nikle the gore haath us ke āstīnoñ se

rahe mahv-e-ḳhayāl us ke to yak diqqat se haath aa.e

nazākat us kamar kī pūchhī ham bārīk-bīnoñ se

ba-rang-e-barg-e-gul saath ek shādābī ke hotā hai

'araq-chīñ bhīgtā hai dilbaroñ ke jab pasīnoñ se

bahut maiñ laḳht-e-dil royā mujhe ik ḳhalq ne jaanā

huā hai pahn merā naam in rangīñ nagīnoñ se

ġhazal hī kī radīf-o-qāfiya kā rafta rahnā hai

nikalnā 'mīr' ab mushkil hai merā in zamīnoñ se

suna jata hai ai ghatiye tere majlis-nashinon se

ki tu daru piye hai raat ko mil kar kaminon se

gai garm-iKHtilati kab ki un sehr-afrinon se

lage rahte hain dagh-e-hijr hi ab apne sinon se

gale lag kar na yak shab kash wo mah so gaya hota

meri chhati jala karti hai ab kitne mahinon se

KHuda jaane hai apna to jigar kanpa hi karta hai

chaDhi tyori se mahbubon ki or abru ki chinon se

bahut kotah-daman KHirqe shaiKHon ke phaTe pae

kahin nikle the gore hath us ke aastinon se

rahe mahw-e-KHayal us ke to yak diqqat se hath aae

nazakat us kamar ki puchhi hum barik-binon se

ba-rang-e-barg-e-gul sath ek shadabi ke hota hai

'araq-chin bhigta hai dilbaron ke jab pasinon se

bahut main laKHt-e-dil roya mujhe ek KHalq ne jaana

hua hai pahn mera nam in rangin naginon se

ghazal hi ki radif-o-qafiya ka rafta rahna hai

nikalna 'mir' ab mushkil hai mera in zaminon se