sunta nahin agarche hamara nigar baat

suntā nahīñ agarche hamārā nigār baat

par muñh pe aa hī jaatī hai be-iḳhtiyār baat

bulbul ke bolne se hai kyoñ be-dimāġh gul

aapas meñ yuuñ to hotī hai yaaro hazār baat

muñh tak raho jo ho vo farībinda harf-zan

is thoḌe sinn-o-sāl meñ ye pechdār baat

bosa de chupke lab kā ki tab kuchh maza nahīñ

pāvegī saare shahr meñ jab ishtihār baat

hai kis kī saut ankar-e-asvāt vā.izā

kab aadmī kī jins kare hai pukār baat

aahū ko us kī chashm-e-suḳhan-go se mat milā

shahrī se kar sake hai kahīñ bhī gañvār baat

yuuñ bār-e-gul se ab ke jhuke haiñ nihāl-e-bāġh

jhuk jhuk ke jaise karte haiñ do-chār yaar baat

āzurda dil ko harf pe laane kā lutf kyā

kartī hai ḳhūñ-chakāñ mire lab se guzār baat

marjāñ koī kahe hai koī un laboñ ko la.al

kuchh rafta rafta pā hī rahegī qarār baat

yuuñ chupke chupke 'mīr' talaf hogā kab talak

kuchh hove bhiḌ kar us se bhī kar ek baar baat

sunta nahin agarche hamara nigar baat

par munh pe aa hi jati hai be-iKHtiyar baat

bulbul ke bolne se hai kyon be-dimagh gul

aapas mein yun to hoti hai yaro hazar baat

munh tak raho jo ho wo faribinda harf-zan

is thoDe sinn-o-sal mein ye pechdar baat

bosa de chupke lab ka ki tab kuchh maza nahin

pawegi sare shahr mein jab ishtihaar baat

hai kis ki saut ankar-e-aswat waiza

kab aadmi ki jins kare hai pukar baat

aahu ko us ki chashm-e-suKHan-go se mat mila

shahri se kar sake hai kahin bhi ganwar baat

yun bar-e-gul se ab ke jhuke hain nihaal-e-bagh

jhuk jhuk ke jaise karte hain do-chaar yar baat

aazurda dil ko harf pe lane ka lutf kya

karti hai KHun-chakan mere lab se guzar baat

marjaan koi kahe hai koi un labon ko lal

kuchh rafta rafta pa hi rahegi qarar baat

yun chupke chupke 'mir' talaf hoga kab talak

kuchh howe bhiD kar us se bhi kar ek bar baat