ta-phunkiye na KHirqa-e-tamat ke tain

tā-phūñkiye na ḳhirqa-e-tāmāt ke ta.iiñ

husn-e-qubūl kyā ho munājāt ke ta.iiñ

kaifiyateñ uThe haiñ ye kab ḳhānqāh meñ

badnām kar rakhā hai ḳharābāt ke ta.iiñ

Dariye ḳhirām-e-nāz se ḳhūbāñ ke ham-nashīñ

Thokar se ye uThāte haiñ āfāt ke ta.iiñ

ham jānte haiñ yā ki dil-e-āshnā-zada

kahiye so kis se ishq ke hālāt ke ta.iiñ

ḳhūbī ko us ke sā.ad-e-sīmīñ kī dekh kar

sūrat-garoñ ne khīñch rakhā haat ke ta.iiñ

itnī bhī harf-nā-shinauī ġhair ke liye

rakh kaan Tuk sunā bhī karo baat ke ta.iiñ

sayyad ho yā chamār ho us jā vafā hai shart

kab āshiqī meñ pūchhte haiñ zaat ke ta.iiñ

āḳhir ke ye sulūk ham ab tere dekh kar

karte haiñ yaad pahlī mulāqāt ke ta.iiñ

āñkhoñ ne 'mīr' sāhib-o-qibla varam kiyā

hazrat bukā kiyā na karo raat ke ta.iiñ

ta-phunkiye na KHirqa-e-tamat ke tain

husn-e-qubul kya ho munajat ke tain

kaifiyaten uThe hain ye kab KHanqah mein

badnam kar rakha hai KHarabaat ke tain

Dariye KHiram-e-naz se KHuban ke ham-nashin

Thokar se ye uThate hain aafat ke tain

hum jaante hain ya ki dil-e-ashna-zada

kahiye so kis se ishq ke haalat ke tain

KHubi ko us ke saad-e-simin ki dekh kar

surat-garon ne khinch rakha hat ke tain

itni bhi harf-na-shinaui ghair ke liye

rakh kan Tuk suna bhi karo baat ke tain

sayyad ho ya chamar ho us ja wafa hai shart

kab aashiqi mein puchhte hain zat ke tain

aaKHir ke ye suluk hum ab tere dekh kar

karte hain yaad pahli mulaqat ke tain

aankhon ne 'mir' sahib-o-qibla waram kiya

hazrat buka kiya na karo raat ke tain