tad us bahishti ru se ye KHalta baham kiya

tad us bahishtī rū se ye ḳhalta baham kiyā

jad barsoñ ham ne sūra-e-yūsuf ko dam kiyā

chehre ko noch noch liyā chhātī kuuT lī

jaane kā dil ke ham ne bahut ġham alam kiyā

marbūt aur logoñ se shāyad ki ve hue

vo rabt o rābta jo bahut ham se kam kiyā

kyā kyā suḳhan zabāñ pe mirī aa.e ho ke qatl

mānind-e-ḳhāma go ki mirā sar qalam kiyā

kī ham ne tab darūne kī sozish se 'āqibat

sab tan-badan is aag ne apnā bhasam kiyā

yaañ apne jism-e-zār pe talvār sī lagī

un ne jo be-dimāġhī se abrū ko ḳham kiyā

is zindagī se maare hī jaanā bhalā thā 'mīr'

rahm un ne mere haq meñ kiyā kyā sitam kiyā

tad us bahishti ru se ye KHalta baham kiya

jad barson hum ne sura-e-yusuf ko dam kiya

chehre ko noch noch liya chhati kuT li

jaane ka dil ke hum ne bahut gham alam kiya

marbut aur logon se shayad ki we hue

wo rabt o rabta jo bahut hum se kam kiya

kya kya suKHan zaban pe meri aae ho ke qatl

manind-e-KHama go ki mera sar qalam kiya

ki hum ne tab darune ki sozish se 'aqibat

sab tan-badan is aag ne apna bhasam kiya

yan apne jism-e-zar pe talwar si lagi

un ne jo be-dimaghi se abru ko KHam kiya

is zindagi se mare hi jaana bhala tha 'mir'

rahm un ne mere haq mein kiya kya sitam kiya