tumko humse lag lagi hai rote hain to hanste ho

tum ko ham se laag lagī hai rote haiñ to hañste ho

ham ne kamar ko khol rakhā hai apnī kamar tum kaste ho

durj-e-gauhar maal nahīñ kuchh deñ dar-basta misr agar

to bhī aisī qīmat par tum aage hamāre saste ho

raste raah meñ dekh liyā hai bastī meñ se nikle tumheñ

kyā jāneñ ham roz-o-shab tum kīdhar raste baste ho

abr-e-karam kī raah tako ab rahmat-e-haq pe nazar rakho

go ki tum ai mastāñ mujrim us ġham se dil-ḳhaste ho

piirī meñ bhī javāñ rakhā hai duḳhtar-e-tāk kī sohbat ne

ya.anī pī pī mai-e-añgūrī 'mīr' hue kaT-maste ho

tum ko hum se lag lagi hai rote hain to hanste ho

hum ne kamar ko khol rakha hai apni kamar tum kaste ho

durj-e-gauhar mal nahin kuchh den dar-basta misr agar

to bhi aisi qimat par tum aage hamare saste ho

raste rah mein dekh liya hai basti mein se nikle tumhein

kya jaanen hum roz-o-shab tum kidhar raste baste ho

abr-e-karam ki rah tako ab rahmat-e-haq pe nazar rakho

go ki tum ai mastan mujrim us gham se dil-KHaste ho

piri mein bhi jawan rakha hai duKHtar-e-tak ki sohbat ne

yani pi pi mai-e-anguri 'mir' hue kaT-maste ho