turfa KHush-ru dam-e-KHun-rez ada karte hain

turfa ḳhush-rū dam-e-ḳhūñ-rez adā karte haiñ

vaar jab karte haiñ muñh pher liyā karte haiñ

ishq karnā nahīñ āsān bahut mushkil hai

chhātī patthar kī hai un kī jo vafā karte haiñ

shoḳh-chashmī tirī parde meñ hai jab tak tab tak

ham nazar-bāz bhī āñkhoñ kī hayā karte haiñ

nafā bīmārī-e-ishqī ko kare so ma.alūm

yaar maqdūr talak apnī davā karte haiñ

aag kā lā.ehā zāhir nahīñ kuchh lekin ham

sham-e-tasvīr se din-rāt jalā karte haiñ

us ke qurbāniyoñ kī sab se judā hai rah-o-rasm

avval-e-va.ada dil-o-jān fidā karte haiñ

rashk ek-ādh kā jī mārtā hai āshiq kā

har taraf us ko to do-chār duā karte haiñ

band-band un ke judā dekhūñ ilāhī maiñ bhī

mere sāhib ko jo bande se judā karte haiñ

dil ko jaanā thā gayā rah gayā hai afsāna

roz-o-shab ham bhī kahānī sī kahā karte haiñ

vaañ se yak harf-o-hikāyat bhī nahīñ laayā koī

yaañ se tūmār ke tūmār chalā karte haiñ

būd-o-bāsh aise zamāne meñ koī kyūñke kare

apnī bad-ḳhvāhī jo karte haiñ bhalā karte haiñ

hausla chāhiye jo ishq ke āzār khiñcheñ

har sitam zulm pe ham sabr kiyā karte haiñ

'mīr' kyā jaane kise kahte haiñ vāshud ve to

ġhuncha-ḳhātir hī gulistāñ meñ rahā karte haiñ

turfa KHush-ru dam-e-KHun-rez ada karte hain

war jab karte hain munh pher liya karte hain

ishq karna nahin aasan bahut mushkil hai

chhati patthar ki hai un ki jo wafa karte hain

shoKH-chashmi teri parde mein hai jab tak tab tak

hum nazar-baz bhi aankhon ki haya karte hain

nafa bimari-e-ishqi ko kare so malum

yar maqdur talak apni dawa karte hain

aag ka laeha zahir nahin kuchh lekin hum

sham-e-taswir se din-raat jala karte hain

us ke qurbaniyon ki sab se juda hai rah-o-rasm

awwal-e-wada dil-o-jaan fida karte hain

rashk ek-adh ka ji marta hai aashiq ka

har taraf us ko to do-chaar dua karte hain

band-band un ke juda dekhun ilahi main bhi

mere sahib ko jo bande se juda karte hain

dil ko jaana tha gaya rah gaya hai afsana

roz-o-shab hum bhi kahani si kaha karte hain

wan se yak harf-o-hikayat bhi nahin laya koi

yan se tumar ke tumar chala karte hain

bud-o-bash aise zamane mein koi kyunke kare

apni bad-KHwahi jo karte hain bhala karte hain

hausla chahiye jo ishq ke aazar khinchen

har sitam zulm pe hum sabr kiya karte hain

'mir' kya jaane kise kahte hain washud we to

ghuncha-KHatir hi gulistan mein raha karte hain