us bad-zaban ne sirf suKHan aah kab kiya

us bad-zabāñ ne sirf suḳhan aah kab kiyā

chupke hī chupke un ne hameñ jāñ-ba-lab kiyā

tāqat se mere dil kī ḳhabar tujh ko kyā na thī

zālim nigāh-e-ḳhashm idhar kī ġhazab kiyā

yaksāñ kiyā nahīñ hai hameñ ḳhāk-e-rah se aaj

aisā hī kuchh sulūk kiyā un ne jab kiyā

ammāma le ke shaiḳh kahīñ mai-kade se jā

bas muġhbachoñ ne had se ziyāda adab kiyā

us ruḳh se dil uThāyā to zulfoñ meñ jā phañsā

al-qissa apne roz ko ham ne bhī shab kiyā

zāhir huā na mujh pe kuchh us zulm kā sabab

kyā jānūñ ḳhuun un ne mirā kis sabab kiyā

kuchh aage aa.e hote jo manzūr lutf thā

ham jī se apne jā chuke tum qasd tab kiyā

bichhḌe tumhāre apnā ajab haal ho gayā

jis kī nigāh paḌ ga.ī un ne ajab kiyā

barsoñ se apne dil kī hai dil meñ ki yaar ne

ik din judā na ġhair se ham ko talab kiyā

kī zindagī so vo kī muue ab so is tarah

jo kaam 'mīr' jī ne kiyā so kuDhab kiyā

us bad-zaban ne sirf suKHan aah kab kiya

chupke hi chupke un ne hamein jaan-ba-lab kiya

taqat se mere dil ki KHabar tujh ko kya na thi

zalim nigah-e-KHashm idhar ki ghazab kiya

yaksan kiya nahin hai hamein KHak-e-rah se aaj

aisa hi kuchh suluk kiya un ne jab kiya

ammama le ke shaiKH kahin mai-kade se ja

bas mughbachon ne had se ziyaada adab kiya

us ruKH se dil uThaya to zulfon mein ja phansa

al-qissa apne roz ko hum ne bhi shab kiya

zahir hua na mujh pe kuchh us zulm ka sabab

kya jaanun KHun un ne mera kis sabab kiya

kuchh aage aae hote jo manzur lutf tha

hum ji se apne ja chuke tum qasd tab kiya

bichhDe tumhaare apna ajab haal ho gaya

jis ki nigah paD gai un ne ajab kiya

barson se apne dil ki hai dil mein ki yar ne

ek din juda na ghair se hum ko talab kiya

ki zindagi so wo ki mue ab so is tarah

jo kaam 'mir' ji ne kiya so kuDhab kiya